بلوچستان و خیبر پختونخوا نا ورناتے روزگار نا وارخواہی تننگ آ چکار نا گرج ءِ،وزیراعظم محمد شہباز شریف

اسلام آباد، وزیراعظم محمد شہباز شریف پارینے کہ کسب کار و لائخ آ ورناتے عزت نا روزگار تننگ حکومت نا اولیت آتیٹی اوار ءِ، نیشنل یوتھ ایمپلائمنٹ پالیسی نا رداٹ ملک انا کنج کنج، خاص وڑ اٹ بلوچستان و خیبر پختونخوا نا ورناتے روزگار نا وارخواہی تننگ آ خاص چکار کننگ نا گرج ءِ۔ سے شنبے نادے آ پی ایم آفس نا میڈیا ونگ آن جاری بیان نا رداٹ وزیراعظم محمد شہباز شریف دا خیال آتا درشانی ءِ تینا کماشی ٹی اڈہلوک نیشنل یوتھ ایمپلائمنٹ پالیسی آ عملدرآمد نا بارواٹ جاچ دیوان اٹی کرے۔ وزیراعظم پارت کرے کہ نیشنل یوتھ ایمپلائمنٹ پالیسی نا رداٹ ورناتے روزگار نا وارخواہی تننگ کن گچین گام گیج آتے پک کننگے۔ نیشنل یوتھ ایمپلائمنٹ پالیسی نا عملدرآمد آپیش رفت نا جاچ دیوان ہر تُو آ مریک، ملک انا کسب کار و لائخ آ ورناتے عزت نا روزگار تننگ حکومت نا اولیت آتیٹی اوار ءِ۔ وزیراعظم پارے کہ حکومت نا کنڈآن ملک انا اولیکو نیشنل یوتھ ایمپلائمنٹ پالیسی نا جاری کننگ ننا پرخلوص کوشست آتا ڈیک ءِ، نیشنل یوتھ ایمپلائمنٹ پالیسی نا رداٹ گام گیج آتے کن بین الوزارتی کمکاری و جامع سج پام المی ءِ، قوم انا ورناک خاص وڑ اٹ زالبول آتا روزگار نا پوسکن آ وارخواہی تیٹی اوار مننگ ءِ پک جوڑ کننگ کن اوفتے کسبکار جوڑ کننگ آ خاص چکارکننگے۔ وزیراعظم پارے کہ نیشنل یوتھ ایمپلائمنٹ پالیسی نا رداٹ ملک انا مُر وخڑک‘ خاص وڑ اٹ بلوچستان و خیبر پختونخوا نا ورناتے روزگار نا وارخواہی تننگ آ خاص چکار کننگ نا گرج ءِ، ملک انا کسبکار ہیومن ریسورس ءِ ملک اٹ و پیشن ملک کاروباری و صنعتی خواست آتتون ہم گرنچ کننگ کن نیوٹک و سمیڈا ٹی ادارہ ئی اصلاحات کننگانے۔ وزیراعظم دا پالیسی نا سوب ورناتے دو بروک آ فائدہ غاتا بابت آگاہی مہم نا پارت جاری کرے۔ دیوان ءِ پاننگا کہ نیشنل ووکیشنل اینڈ ٹیکنیکل ٹریننگ کمیشن ہیومن ریسورس کن خاص وڑ اٹ جہانی سرٹیفیکیشن و درکار زبان آ چاہنداری کن ہم خاص گام گیج کننگ ءِ، ورناتے پیشن نا ملک روزگار تننگ کن مارکیٹ نا ڈیمانڈ نا رداٹ ہیلکاری تننگ انگ ءِ، حکومتی گام گیج آتا سوب ڈیجیٹل یوتھ ہب انا کمک اٹ ملک انا ورناتے اسہ پلیٹ فارم اسے آ ملک اٹ و پیشن ملک روزگار نا وارخواہی تا سرجم حوال آتے تننگ انگ ءِ، نیشنل یوتھ ایمپلائمنٹ پالیسی آ گچین عملی گام گیج کن کل وزارت و تعلقدار ادارہ غاک تین پہ تینی کمکاری و سلابت اٹ کاریم کننگ ءُ، تعلیمی ادارہ غاتیٹی یوتھ ڈویلپمنٹ سیل جوڑ کننگ انگ ءِ ہرا ورناتا راہشونی و کیریئر کونسلنگ تون اوار اوار اوفتا روزگار و کسبکاری نا وارخواہی تیان معلومدار کیک۔ دیوان اٹ پرائم منسٹر یوتھ پروگرام نا چیئرمین رانا مشہود احمد خان وزیراعظم نا پارت نا رداٹ کروک آ گام گیج آتیا حوال تس۔ دیوان اٹ نائب وزیراعظم و وزیر خارجہ محمد اسحاق ڈار، بنجائی وزیر ڈٹ بندی و شونداری احسن اقبال، بنجائی وزیر اقتصادی باندات احد خان چیمہ، بنجائی وزیر حوالکاری و شینکاری عطاء اللہ تارڑ، بنجائی وزیر موسمیاتی بدلی مصدق ملک، بنجائی وزیر انفارمیشن ٹیکنالوجی شزا فاطمہ خواجہ، چیئرمین وزیراعظم یوتھ پروگرام رانا مشہود احمد خان و ایلو تعلقدار سرکاری ادارہ غاتا افسر آک بشخ ہلکر۔