اسسٹنٹ کمشنر لونی فتح خان بنگلزئی نا تعلیمی و جانجوڑی بنجا غاتا دورہ

ڈپٹی کمشنر دکی فضل الرحمن کبدانی نا پارت آ اسسٹنٹ کمشنر لونی فتح خان بنگلزئی تحصیل لونی نا جتا جتا تعلیمی و جانجوڑی ہند آتا دورہ ءِ کرے و ہموڑے فراوان کروک آسراتی تا خوڑتی اٹ جاچ ءِ ہلک۔ اسسٹنٹ کمشنر گورنمنٹ بوائز ہائی اسکول مانزئی، گورنمنٹ بوائز مڈل اسکول واہوی، گورنمنٹ پرائمری اسکول کلی واجد ڈھاکی، رورل ہیلتھ سنٹر (RHC) واہوی و بنداوی جانجوڑی ہند (BHU) حیدر خان مانزئی نا دورہ ءِ کرے۔ دورہ نا وخت آ او کارندہ غاتا حاضری، سفائی نا حالیت‘ تدریسی و طبی آسراتی، دارو تا دوئی و الس ءِ فراوان کروک خذمت آتا جاچ ءِ ہلک۔ او تعلقدار کارندہ غاتے پارت کرے کہ ہند آتے ٹی نظم و ضبط، سفائی و سروس ڈلیوری نا آب ءِ پین جوان کننگے و طالب علم و ناجوڑ آتے آب اٹو تعلیمی و طبی آسراتی تا فراوانی امر کہ مرے پک کننگے۔ فتح خان بنگلزئی پارے کہ سرکاری ادارہ غاتیٹی الس ءِ جوان آسراتی تا فراوانی انتظامیہ نا اولیکو اولیت ءِ‘ ہندا سوب آن کل تعلقدار کارندہ غاک تینا زمواری تے گچین وڑ اٹ ادا کرسا السی خذمت آتیٹی پین جوانی اتیر۔