سپریم کورٹ،بانی پی ٹی آئی ءِ شفا انٹرنیشنل ہسپتال آ گدریفنگ نا پرمان

اسلام آباد، سپریم کورٹ بانی پی ٹی آئی عمران خان تون ایڑھ تتون اوار ایلوفتا اوڑدہی و جندی ڈاکٹر اسکان رسینگ گیگ نا کیس انا سماعت نا وخت آ بھلو پرمان اس جاری کرینے و بانی پی ٹی آئی ءِ شفا انٹرنیشنل ہسپتال آ گدریفنگ نا پرمان کرے۔ و شفا ہسپتال میڈیکل بورڈ جوڑ کننگک۔ عدالت پورو میڈیکل ریکارڈ و تدوک آ مسہ سال انا اوڑدہی تا سرجم ءِ ہم بٹنگانے۔ عدالت بانی پی ٹی آئی نا درمان آ سیاست کننگ آن ہم تورے، عمران خان بروک آ سماعت اسکان ہسپتال اٹی مریک‘ سپریم کورٹ مستی سماعت ءِ 16 ستمبر اسکان پدبٹے۔ بنجائی حکومت نا کنڈ آن ایڈیشنل اٹارنی جنرل ہسپتال آ گدریفنگ ناپرمان آ اعتراض کرسا پارے کہ حکومت ءِ نوٹس جاری کننگتنے ہراڑا عدالت حکومت نا اعتراض ءِ ہم پرمان نا بشخ جوڑ کرے۔ و پارے کہ اگہ نوٹس الو تو گڑاا عدالت اٹی انتئے ہیت کننگ اُرے۔ عدالت تینا پرمان اٹ پارینے کہ بانی پی ٹی آئی ءِ اینو ہسپتال آ گدریفنگے‘ بانی پی ٹی آئی ءِ سخت سیکورٹی ٹی ہسپتال آ گدریفنگے۔ ہسپتال نا پیشن آ امن وایمنی نا حالیت زہمی مف۔ عدالت ہفتہ ٹی اسہ دے خاہوت تون اوڑدہی کرفنگ نا پرمان کرے‘ عدالت پارے کہ ڈاکٹر فیصل سلطان و ڈاکٹر عظمیٰ ہم تون اوار مریرہ۔ جسٹس شاہد وحید پارے کہ میڈیکل رپورٹ آتا رد اٹ بانی پی ٹی آئی نا نئے نبض نارمل ءِ و نئے است‘ و رپورٹ نا رِداٹ اونا وائٹل آرگنز زہمی مننگ بنا کرینو۔ او پیدوار کرے کہ ایڑھ تتون اوڑدہی کس آ تورو اس اف بلکہ بنداوی حق ءِ و ریاست نا کاریم دا اف کہ او کانود نا خلاف ورزی ءِ کے۔ سماعت نا بنا ٹی وکیل عزیر بھنڈاری خواست کرے کہ بانی نا تینا جند انا درمان کروک ڈاکٹر عاصم یوسف و ڈاکٹر عظمیٰ خان تون اوڑدہی کرفنگے و باور کرفے کہ اوڑدہی آن پد میڈیا ٹاک کننگپک۔ جسٹس شاہد وحید سوج کرے کہ میڈیکل ریکارڈ تننگ اٹی انت ویل اسے، ہرا مواد تننگانے او بیرہ سمری ءِ‘ پورو ریکارڈ عدالت اٹی پیش کننگے۔