بھارتی پروپیگنڈا پاکستان نا برخلاف برجا مہم نا اسہ پین کوشست اسے،ترجمان دفتر خارجہ

پاکستان بھارتی وزیر داخلہ نا کنڈ آن بھارت اٹی مروک گڑاس دزگیری تے پاکستان تون گنڈنگ نا دوبہ غاتے سختی اٹ مسترد کرسا اوفتے بے بنداو و بدنیتی آ تالان گوندانے‘ ترجمان دفتر خارجہ طاہر حسین اندرابی پارینے کہ بھارتی پروپیگنڈا پاکستان نا برخلاف برجا مہم نا اسہ پین کوشست اسے، ہرا نا مسخت بھارت اٹ سیکورٹی ویل آتیان چکار ءِ اینک کننگ و کچ اٹنگا سیاسی فائدہ غاتے کن پاکستان آ دوبہ خلنگ ءِ۔ ترجمان دفتر خارجہ نا رِداٹ پاکستان بھارتی وزیر داخلہ نا پاکستان ءِ بھارت اٹی مروک گڑاس دزگیری تتون گنڈنگ نا بے بنداو دوبہ غاتے سختی اٹ مسترد کیک۔ او پارے کہ دا وڑ انا پروپیگنڈا بھارت نا تہہ انا ویل آتیان جہانی چکار ءِ اینک کننگ نا کوشست اسے۔ طاہر حسین اندرابی پارے کہ بھارت ملک انا تہٹی اسہ بیدادی کروک ءُ ریاست اسے نا وڑ اٹ اقلیت آتیا بیدادی کننگ اٹی ءِ و آجوسلاہ درشانی ءِ گٹو کننگ اٹی ءِ۔ وخت اس کہ ملک آن پیشن ہم بھارت آ دہشت گردی برآمد کننگ و دہشت گرد آتا کمک نا دوبہ غاک لگانو۔ ترجمان پارے کہ بھارتی بے بنداو دوبہ غاک جہانی برادری نا چکار ءِ بھارت نا ریاستی کاٹم خواجہی ٹی مروک دہشت گردی، ہدفی خون و ملک آن پیشن تخریبی سرجز آتیان اینک کننگ کپسہ۔ او پارے کہ پاکستان کیہی وار بھارت نا کنڈ آن پاکستان اٹی دہشت گردی و بے ایمنی ودی کروک سرجز آتیٹی اوار مننگ نا شاہدی تے جہانی کہول آ پیش کرینے۔ ترجمان نا رِداٹ بھارتی بحریہ نا کمانڈر کلبھوشن جادیو نا دزگیری، سزا و پاکستان اٹی ساڑی گری ءِ پاکستان بھارت نا تخریب کاری و دہشت گردی ٹی دراست نیام تمنگ نا تردید مفروک شاہدی اس گوندانے۔ ترجمان دفتر خارجہ جہانی برادری آ زور شاغا کہ او بھارت نا بے بنداو دوبہ غاتے مسترد کے و ڈیہہ اٹی بھارت نا ریاستی کاٹم خواجہی ٹی مروک دہشت گردی کن اوڑان پرسجو کننگے۔