ملک انا اصل ویل آتیان چکار اینک کننگ کن صوبہ غاتا ایشو اتنگا،مولانا فضل الرحمان

اسلام آباد، جمعیت علماء اسلام نا سروک مولانا فضل الرحمان پارینے کہ اگہ ناجوڑ اسے ویل مون ایتے تو اودے دمدستی ایسر کننگے، سپریم کورٹ نا فیصلہ ءِ بھاز مہالو بروئی ئس، ولے داسہ فیصلہ بسنے تو ”دیر آید درست آید“۔ میڈیا تون ہیت وگپ کرسا مولانا فضل الرحمان پارے کہ داسہ تحریک انصاف ءِ فیصلہ کروئی ءِ کہ او برانز کیک یا اودے پد بٹک۔ صوبہ غاتا باندات آ شرہ مننگ کیک، اصولی وڑاٹ نن پوسکن آ یونٹ آتا برخلاف افن و نن بہاولپور صوبہ نا ہم مخ تفی ءِ کریسن، ولے سندھ صوبہ نا بشخ و پانٹ آ راضی افن۔ او پارے کہ ہراتم مہالو صوبہ جوڑ کننگ نا ہیت مسکہ تو ہمو وخت آ اسٹیبلشمنٹ ہم مخالفت کننگ ئس، اینو ہرا وحی بس کہ وار اس ملک ءِ 16 و وار اس 32 یونٹ آتیٹی بشخنگ نا ہیت مننگ اٹی ءِ‘ ملک انا اصل ویل آتیان چکار ءِ اینک کننگ کن صوبہ غاتا ایشو ءِ اتنگانے، دا وخت آ نئے پوسکن صوبہ جوڑ کننگ کن چاگڑد جوان ءِ ونئے پاکستان بے سنجیدہ ہیت وگپ سگنگ کیک۔ مولانا فضل الرحمان پارے کہ پاکستان نا ڈغار دتر آن خیسن ءِ‘ پیشن نا دنیا تون تعلقداری تے جوان کننگے ولے تینا اُرا ءِ ہم جوان کروئی مریک۔ اسلامی دنیا نا بلاک جوڑ کننگ جمعیت علماء اسلام نا منشور نا بشخ اسے۔ او پیپلز پارٹی و مسلم لیگ (ن) نا بیان تیٹی تضاد آ تنقید کرسا پارے کہ اسہ ایلو آ وڈی خوری نا دوبہ خلوک آک اینو اسہ ایلو ءِ جاہل گوندنگ اٹی ءُ، اوفتیکن اقتدار و کرسی اہم ءِ۔ راولاکوٹ نا حالیت آ ہیت وگپ کرسا مولانا فضل الرحمان پارے کہ اسہ کنڈ آ کشمیری الس آن وونٹ ہلنگ انگ ءِ وخت اس کہ ایلو کنڈآ راولاکوٹ اٹی اِرا تُو آن بندغ آک دھرنا ٹی تولوک ءُ۔ دھرنا ٹی تولوک بندغ آتا خواست آک باغیانہ افس و اوفتا خواست آتے اسہ وار امنا ہم کننگانے۔