ملک انا زرگزرانی شونداری ٹی پردیسی پاکستانی تا کڑد بھاز اہم ءِ،گورنر بلوچستان جعفرخان مندوخیل

نیویارک، گورنر بلوچستان جعفر خان مندوخیل امریکہ نا سرکاری دورہ نا وخت آ تدوک آ نن ہوسٹن شار اٹی جشنِ آزادی پاکستان نا رد اٹ اڈ تروک دود انا شریدار آتیان تران کرسا پاکستان تون اوار دنیا نا جتا جتا ملک آتیٹی آباد کل پاکستانی و پاکستانی پردیسی تے یومِ آزادی نا است انا ہُب اٹ مبارکبادی تس۔ وطنِ عزیز آن ہزار آ میل مُر رہینگ انگ آن پد ہم نما مہر و جوزہ حب الوطنی ٹی ہچ ءُ کمتی اس بتو ہرا ستا کڑزک۔ دا وخت آ جہانی شہرت یافتہ پاکستانی بزنس مین تنویر احمد، طاہر بھٹی، ڈاکٹر آصف قدیر و میکسم نا چیف ایگزیکٹو آفیسر عزیر حسن تون اوار نرینہ و زالکار آتا بھلو کچ اس ساڑی ئس۔ شریدار آتیان تران کرسا گورنر بلوچستان جعفر خان مندوخیل پارے کہ ای تینا دورہ امریکہ نا وخت آ اقوامِ متحدہ نا ہیڈکوارٹر نیویارک اٹی یوتھ انٹرنیشنل آرگنائزیشن نا کنڈآن اڈ ہلوک “یوتھ اینڈ آرٹیفیشل انٹیلیجنس سمٹ” اٹی بشخ ہلنگ کن بسٹ ہراڑے نن مچ آ پاکستان نا ورنا تا مقدمہ ءِ پبی وڑاٹ پیش کرین۔ کنے اومیت ءِ کہ دا جہانی پلیٹ فارم آ مروک آ ننا کوشست آتا جوان بھرم زُوت مونی بریک‘ او پارے کہ کنے دا سما مننگ آ ہم خوشی مس کہ ہوسٹن شار اٹی پاکستانی کمیونٹی خاص وڑ اٹ پاکستانی کاروباری بندغ و پوریاگر آتا بھلو کچ اس آباد ءِ‘ نم نئے بیرہ تینا خواری و سرسہبی تا کمک اٹ پاکستان نا پن ءِ روشنا کننگ اٹی اُرے بلکن وطنِ عزیز نا مثبت امیج ءِ پاش کننگ اٹی ہم اہم کڑد ادا کننگ اٹی اُرے‘ گورنر مندوخیل پارے کہ دا راست ءِ کہ پاکستان نا زرگزرانی شونداری و سوگوی کن پرائیویٹ سیکٹر، ہندی زرکار و و اوورسیز پاکستانی تا کڑد بھاز اہم ءِ‘ پیشن ملک رہینگوک پاکستانیک نئے بیرہ تینا خاہوت آتا مالی کمک ءِ کیرہ بلکن زرراہی تس نا کمک اٹ ملکی زرگزران نا سوگوی ٹی ہم نمان کڑد ادا کننگ اٹی ءُ۔ داکان بیدس اوفتا لائخی، آزموندہ، زرکاری و جہانی کاروباری رابطہ غاک ہم پاکستان نا زرگزرانی شونداری کن اسہ نہادی ءُ میرات اسے ءُ۔ گورنر بلوچستان جعفر خان مندوخیل پارے کہ پاکستانی مننگ نا سوب آن ننے نمے آن بھلو اومیت اس ارے۔ کنا استخواہی ءِ کہ نم پاکستان و خاص وڑ اٹ بلوچستان نا شونداری و آسودہی ٹی تینا پبی کڑد ادا کیرے و تینا زر‘ آزموندہ و کاروباری لائخی تے وطنِ عزیز نا پیداواری زرگزران تون گنڈنگ کن کاریم اٹ اتیرے۔ خاص وڑ اٹ امریکہ اٹی رہینگوک پاکستانی پوریاگر‘ زرکار و کاروباری شخصیت آتا کمکاری پاکستان کن بھاز اہم ءِ‘ نن اومیت کینہ کہ پیشن ملک رہینگوک پاکستانیک دا وارخواہی تیان فائدہ ہرفسا پاکستان و بلوچستان نا شونداری ٹی تینا بشخ ءِ شاغرہ۔ گڈسر اٹی گورنر بلوچستان پارے کہ تینا وطن آن ہزار میل مُر مننگ آن پد ہم پاکستان نا مہر نمے ٹی ہندن زندہ ءِ ہراڑکن کل منتظم و دود اٹ بشخ ہلوک ہر بندغ ستا کڑزک۔ داکان مست گورنر بلوچستان جعفر خان مندوخیل نا ہوسٹن شار انا اسنڈی محل بینکویٹ ہال اٹی بننگ آ پاکستانی کمیونٹی نا سرکڑدہ غاک گورنر بلوچستان نا جم وجوش اٹ بخیر کریر۔ پاکستانی کمیونٹی نا کنڈ آن اسہ شانی ءُ مہمانی سے نا بست و بند کننگا۔ مہمانی ٹی گورنر جعفر مندوخیل کل شرفمند آ مہمان تتون اوڑدہی کرے‘ اوفتتون حال حوال کرے و شریدار آتتون اوار گروپ فوٹو ہم ہلفے۔ مہمانی نا بست و بند گچین و ایلمی چاگڑد اٹی مس ہراٹی پاکستان و امریکہ ٹی رہینگوک پاکستانی کمیونٹی نا نیام اٹی رابطہ و تین پہ تینی کمکاری ءِ پین شون تننگ آ ہم گپ و تران مس۔