خاران اٹی سیکورٹی فورس آتا سرسہب آپریشن، 7 دہشت گرد خلنگار،آئی ایس پی آر

خاران، اسلام آباد، بلوچستان نا ضلع خاران نا علاقہ لجے ٹی سیکورٹی فورس آک انٹیلی جنس بیسڈ آپریشن نا وخت آ فتنہ الخوارج نا 7 دہشت گرد آتے خلکر‘ وخت اس کہ کیہی دہشت گرد آک ٹھپی ہم مسر۔ سیکورٹی حوالی تا رِد اٹ آپریشن ردالفتنہ 3 نا رِد اٹ دہشت گرد آتا ساڑی گری نا اودیم حوال آ کارروائی کننگا۔ آپریشن نا وخت آ دہشت گرد آتا ہند آتے پورو وڑاٹ بھس کننگا۔ حوالی تا رِد اٹ دہشت گرد آتیان پوسکنوڑ سلہہ، بھلو کچ اسے ٹی منچر وایلو جنگی گڑا، 2 گاڈی و اسہ موٹرسائیکل اس ہم دوئی کننگا۔ سیکورٹی حوالی تا رد اٹ خلنگوک دہشت گرد آک خاران و لجے نا علاقہ غاتیٹی لٹ و پل، بھتہ خوری، تاوان کن برمتہ کننگ‘ ٹارگٹ کلنگ و خودکش جلہو آتا ڈٹ بندی نا زمواری ئسر۔ سیکورٹی فورس آک بلوچستان اٹی آپریشن ردالفتنہ 3 نا رِد اٹ دہشت گردی نا پورو ایسری کن کارروائی تے برجا تخانو۔ حوالی تا رِد اٹ گڈیکو دہشت گرد نا چٹفنگ اسکان کارروائیک برجا سلرہ و دہشت گرد آتے ایسر اسکان سر کننگ کن کل المی گام گیج کننگک۔ بنجائی وزیر داخلہ محسن نقوی خاران اٹی فتنہ الہندوستان نا دہشت گرد آتا برخلاف سرسہب انٹیلی جنس بیسڈ آپریشن آ سیکورٹی فورس آتے خراجِ تحسین پیش کرینے۔ محسن نقوی پارے کہ آپریشن ردالفتنہ 3 نا رِد اٹ سیکورٹی فورس آک وخت آ کارروائی کرسا 7 دہشت گرد ءِ خلکر۔ بنجائی وزیر داخلہ سیکورٹی فورس آتا کسبی لائخی تا ستا ءِ کرسا پارے کہ دہشت گردی نا برخلاف سینہ تروک سیکورٹی فورس آتابہادر آ ورناک مچ آ قوم انا گمر ءُ۔ او پارے کہ بلوچستان اٹی امن کن سیکورٹی فورس آتے رسینگوک نمان سرسہبیک ستا کڑزرہ۔ دہشت گردی نا برخلاف جنگ اٹی مچ آ قوم یک زبان و اسٹ ءِ‘ محسن نقوی پیدوار کرے کہ اخریکو دہشت گرد نا چٹفنگ اسکان انٹیلی جنس بیسڈ آپریشن آک برجا سلرہ و ملک اٹی امن و سلامتی ءِ پک کننگ کن ہر وڑا نا گام گیج کننگک۔