کلی مینگل آباد اٹی لمہ و مسڑ ءِ کسفنگ بلوچ روایت آتے لتاڑ کننگ اسے، زالبول پارلیمنٹرینز بلوچستان

پاکستان پیپلز پارٹی و پاکستان مسلم لیگ (ن) نا زالکار صوبائی وزیر، ڈپٹی اسپیکر صوبائی اسمبلی غزالہ گولہ، صوبائی وزیر راحیلہ حمید خان درانی، صوبائی سلاہکار گوازی مینا مجید بلوچ، صوبائی اسمبلی نا باسک ہادیہ نواز بہرانی اسک پارینو کہ فتنہ الہندوستان نا دہشت گرد آک کلی مینگل آباد اٹی لمہ و مسڑ نا خون ءِ کرسا بلوچ آتا روایت آتے لتاڑ کرینو ہرا نا سوب آن دہشت گرد آتا مکروہ دروشم دنیا نا مون آ پاش مسنے و دا لغوری عمل نا برخلاف کاریم کروک آ انسانی حق آتا چمپئن تنظیم آتا چُپی گڑتی نا سوب ءِ۔ ننے کل ءِ بلوچستان اٹی امن دشمن آتے شکست ترسا پرامن بلوچستان نا تغ ءِ پورو کروئی ءِ‘۔ دا خیال آتا درشانی ءِ او یک شنبے نادے سول سیکرٹریٹ نا سکندر جمالی آڈیٹوریم اٹی پریس کانفرنس نا وخت آ کریر۔ او پاریر کہ بلوچستان قبائلی صوبہ اسے و داڑے رہینگوک قبیلہ غاتا روایت و دود ربیدہ ءِ دروری پاننگانے ولے اینو داڑے رہینگوک آتتون اوار زالکار آک اُرا تیٹی ہم رکھوک افس، تدوک آ دے تیٹی فتنہ الہندوستان نا دہشت گرد آک نوشکے نا علاقہ کلی مینگل آباد اٹی رہینگوک سرکاری کارندہ حنیفہ بی بی و حفصہ بی بی ءِ اُرا ٹی پترینگسا خلکر ہرانا اخس کہ ءِ مذمت کننگے کم ءِ‘ دا خاہوت نوکاپ آن زہمی مس‘ پاک فوج انا کمک آن اوفتا اُرا بحال مسوسس ولے اوفتے اُرا ٹی پترینگسا کسفسا دہشت گرد آک بلوچ قوم انا خیرخواہ مننگ کپسہ و اُرا تیٹی جلہو کرسا زالکار آتے کسفنگ ہرا بلوچیت ءِ۔ فتنہ الہندوستان بیرہ سیکورٹی فورس آخا بلکن بے گناہ شاری تے ہم شست کننگ اٹی ءُ و ڈکوئی اٹ جلہو کیرہ‘ اوفتے چٹفنگ کن سیکورٹی فورس آک تینا کاریم ءِ کننگ اٹی ءُ اوفتے درست کرفنگ کن الس ءِ ہم تینا کڑد ءِ ادا کروئی مریک‘ نن کل ءِ بلوچستان اٹی بے ایمنی تالان کروک دشمن آتے شکست ترسا امن ءِ بحال کروئی ءِ‘ فتنہ الہندوستان نا دہشت گرد آک زالکار و چناتے شست کننگ اٹی ءُ ننے کل ءِ دہشت گرد آتا برخلاف اسہ زبان و اسٹ مرسا توار چست کروئی ءِ‘ اینو انسانی حق آتا تنظیم آک لمہ و مسڑ نا خون آ انتئے چُپ ءُ، دا واقعہ چادر و چار دیوالی نا لتاڑ اسے ہرا پاش آ پاش دہشت گردی اسے، دا زالکار آتیا ہم جلہو کننگ اٹی ءُ ہرافک ہر گڑا آن مستثنیٰ ءُ، بھارتی اسپانسرڈ دہشت گرد آک پاش مسنو۔ پارلیمنٹ اٹی تولوک نن زالکار آک دا واقعہ نا مذمت ءِ کرسا چُپ تولپنہ و زالبول آتا حق و انصاف کن توار چست کرسا کینہ۔ بے گناہ زالبول آتیا بیدادی و اوفتے خلنگ نا راج انا ہر تپہ مذمت ءِ کیک و زالبول آتے کاریم و محب وطنی آن توننگ ہرا جاگہ نا انصاف ءِ۔ دہشت گرد آک دا وڑ انا خلیفوک کارروائی کرسا تینا مسخت آتے دوئی کننگ کپسہ۔ مذہب و جہانی کانود آتیٹی ہم زالبول آتے جنگ آتیٹی استثنیٰ دوئی ءِ‘ اُرا تیٹی تولوک زالبول آتے شست کننگ بلوچستان نا روایت آتیان چَپ ءِ‘ نن دا وڑ انا کانود آن چَپ کاریم کرسا راج ءِ ہرا کنڈ آ دننگ اٹی اُن و 21 می کرن نا پوسکن آ دور اٹی ہم دا وڑ انا وڑک عقل آن پیشن ءُ۔ داخس بھلو واقعہ اسے آن پد ہم کس اس مذمت کتو ہرا ننا کل کن ارمان نا ہیت اسے۔