نیشنل پارٹی پوسکن ءُ صوبہ جوڑ کننگ نا سلاہ ءِ منپک،مون اٹ تے سلک،ڈاکٹر عبدالمالک بلوچ

نیشنل پارٹی نا سروک مسکوہی وزیراعلیٰ بلوچستان و صوبائی اسمبلی نا باسک ڈاکٹر عبدالمالک بلوچ پارینے کہ سوراب واقعہ راستی ءِ پاش کرینے و بروک آ وخت اٹی بلوچستان اٹی پین بھسکاری نظر بننگ اٹی ءِ۔ بلوچستان نا ویل سیاسی ءِ و اودے سیاسی وڑاٹ ایسر کننگ مریک انتئے کہ سیکورٹی فورس و مزاحمت کار آک مذاکرات کننگ کن تیار افس۔ پوسکن آ صوبہ غاتا جوڑ کننگ مسترد کرسا او پارے کہ دانا مون اٹ سلنہ۔ ساڑی حالیت آتیٹی پوسکن آ صوبہ غاتا جوڑ کننگ پاکستان کن پین بھسکاری نا سوب مریک۔ پارٹی ءِ پین فعال و سوگو کننگ کن مچ آ ملک انا کہول آ بھلا سیاسی جماعت آتتون رابطہ کرسا متحرک گام گیج کننگک۔ دا خیال آتا درشانی ءِ او یک شنبے نا دے کوئٹہ پریس کلب اٹی کوئٹہ نا ہنکینی میر احمد مری نا تینا سنگت، برادری، عزیز و 60 خاہوت آتتون اوار نیشنل پارٹی ٹی اوار مننگ ناوخت آ پریس کانفرنس نا وخت آ کرے داوخت آ ڈاکٹر اسحاق بلوچ، صوبائی صدر محمد اسلم بلوچ، جنرل سیکرٹری چنگیز حی بلوچ ایڈووکیٹ، شاوس خان بزنجو، میر محراب مری، ڈپٹی پارلیمانی میر رحمت صالح بلوچ، یاسمین لہڑی، داد محمد بلوچ، عبدالخالق بلوچ و ایلوفک ہم ساڑی ئسر۔ ڈاکٹر عبدالمالک بلوچ میر احمد مری ءِ جماعت اٹی اوار مننگ آ بخیر کرسا پارے کہ نن ایلو قوم تے ہم پارٹی اٹی اوار کینہ۔ نن اسلام آباد اٹی حکمران آتا مون آ بلوچستان نا ویل آتا ایسری کن 17 ٹک پیش کرینن ہرافتیا عملدرآمد آن ویل آتا ایسری پک مننگ کیک۔ او پارے کہ ویل آتا ایسری نا جاگہ غا گڑا نہ گڑاسے آ غوغا کننگ انگ ءِ وخت اس 18 می ترمیم ءِ رول بیک کننگ، این ایف سی ٹی بدلی نا ہیت آک کننگاکہ ولے بنجا داٹی بدلی آن بیدس بلوچستان آن زر کاٹ کرینے و پوسکن آ صوبہ غاک بایدے جوڑ مفس۔تاریخی وڑاٹ مریرہ تو کانودی فریم ورک اٹی گڑاس مرے ولے گڑاس واکدار آتا استخواہی ءِ کہ صوبہ غاک جوڑ مریر ولے اسٹیبلشمنٹ دا وڑ انا غوغا کرسا سیاسی جماعت آتیا زور شاغک و ہراٹی او سرسہب مسنے۔ او پارے کہ پاکستان مسلم لیگ (ن)، جمعیت علماء اسلام تون اوار بھلا جماعت آک صوبہ غاتا جوڑ کننگ کن راضی افس انتئے کہ دا عمل آن مشکل آک کم مفسہ بلکن ودرہ، ملک ءِ پین خاخر اٹ دھکہ تننگ آنبار مریک۔