نوشکے گیس پلانٹ آن گیس سپلائی بند، الس خوار مننگ ءِ، ایم پی اے

ایم پی اے نوشکے، جمعیت علماء اسلام نا راہشون حاجی میر غلام دستگیر بادینی نوشکے گیس پلانٹ آن تدوک آ تُو اسے آن شاری تے گیس انا فراوانی نا بند مننگ آ گڑتی و ترندی نا درشانی ءِ کرسا پارینے کہ سوئی سدرن گیس کمپنی نا کنڈ آن نوشکے نا الس ءِ پدریسہ تُو اسے آن گیس انا آسراتی آن زہمی تخنگ بھلو ارمان نا سوب و سگ آن پیشن ءِ‘ او پارے کہ نوشکے نا شاریک باقاعدگی اٹ گیس انا بل ایترہ‘ اوکان پد ہم اوفتے بنداوی آسراتی نا فراوانی آن زہمی تخنگ انگ ءِ‘ بل آتا ہلنگ برجاءِ ولے گیس انا سپلائی بند ءِ‘ ہرا الس تون بے انصافی و پہہ مننگ آن ایڑتر ءُ عمل اسے۔ بنجائی حکومت و سوئی سدرن گیس کمپنی الس نا خواری تے سنجیدگی اٹ ہلسا عملی گام گیج کیر۔ ایم پی اے نوشکے پیدوار کرے کہ الس آن گیس انا بل ہلسا اوفتے گیس انا آسراتی آن زہمی تخنگ ہچ ءُ وڑ اسے ٹی روا اف۔ تعلقدار کمامدار آک پین ہُرے کننگ نا جاگہ غا دمدستی گام گیج کیر۔