خضدار نا الس ءِ جانجوڑی و ایلو بنداوی آسراتی تا فراوانی ءِ پک کینہ،میر یونس عزیز زہری

خضدار، اپوزیشن لیڈر بلوچستان اسمبلی میر جھالاوان میر یونس عزیز زہری کمشنر خضدار قادر بخش پرکانی، ڈپٹی کمشنر عبدالرزاق ساسولی، ایس ایس پی خضدار دوستین دشتی، چیف آفیسر وڈیرہ محمد صالح جاموٹ، ایکسین بلڈنگ سلیم عمرانی، ایکسین پی ایچ ای عبدالرؤف قمبرانی، ایکسین ایریگیشن سعید مصطفی، آل پارٹیز شہری ایکشن کمیٹی نا چیئرمین بشیر احمد جتک، ایم ایس شبیر احمد مینگل، ڈی ایچ او خضدار، انجینئر نیاز زہری، انجینئر یونس رمضان موسیانی تون اوار ضلع خضدار نا بڑزکو کہولی افسر آتتون اوار جھالاوان ٹیچنگ ہسپتال خضدار نا اہم و جم دورہ ءِ کرے۔ دورہ نا وخت آ اپوزیشن لیڈر بلوچستان اسمبلی میر یونس عزیز زہری بی ایس ڈی آئی نا گام انا رداٹ بحال کروک آپریشن تھیٹر نا باقاعدہ بناءِ کرے۔ داوخت آ او ہسپتال نا جتا جتا بشخ آتا جم جاچ ءِ ہلک و ناجوڑ آتے فراوان کروک طبی آسراتی، سفائی نا حالیت‘ درمان نا بست و بند و ہسپتال نا جم حالیت آتا جاچ ءِ ہلک۔ اپوزیشن لیڈر میر یونس عزیز زہری، کمشنر قلات ڈویژن قادر بخش پرکانی، ڈپٹی کمشنر خضدار عبدالرزاق ساسولی ہسپتال نا جتا جتا بشخ آتیٹی ساڑی افسر و کارندہ غاتتون اوڑدہی کریر، اوفتا کارکڑد و الس ءِ طبی آسراتی تا فراوانی کن کروک کوشست آتا ستاءِ کریر و ہسپتال اٹی پین جوانی کن المی گام گیج آتیا ہم ہیت و گپ کریر۔ دا وخت آ تعلقدار کمامدار آتا کنڈ آن ہسپتال اٹی برجا شونداری و طبی گام گیج، ناجوڑ آتے فراوان کروک آسراتی و آخبت نا ڈٹ آتا بابت ایم ایس ٹیچنگ ہسپتال خضدار ڈاکٹر شبیر احمد مینگل اپوزیشن لیڈر میر یونس عزیز زہری، کمشنر قلات ڈویژن و ڈپٹی کمشنر خضدار ءِ جم بریفنگ تننگا۔ ایم پی اے خضدار میر یونس عزیز زہری پارے کہ خضدار نا الس ءِ جانجوڑی تون اوار بنداوی آسراتی تا فراوانی و سرکاری ادارہ غاتے فعال و بھرمی جوڑ کننگ ننا اولیکو اولیت آتیٹی اوار ءِ۔ ہسپتال اٹی ساڑی آسراتی آتے پین جوان کننگ و الس ءِ درمان نا گچین آسراتی تا فراوانی کن وس انا کچ آ گام گیج کننگک۔ دورہ اخیر اٹ میر یونس عزیز زہری ضلعی انتظامیہ و ہسپتال انتظامیہ نا کنڈ آن السی خذمت و ادارہ نا جوانی کن برجا گام گیج آتا ستاءِ کرے۔ داکان بیدس ایم پی اے خضدار میر یونس عزیز زہری ہسپتال اٹی ساڑی چنا تا وارڈ انا ہم دورہ ءِ کرے و ہسپتال اٹی پوسکن تفنگوک ایلو ڈٹ آتیا برجا کاریم نا جاچ ءِ ہلک‘ اپوزیشن لیڈر بلوچستان اسمبلی ضلعی افسر آتتون اوار ٹی بی ایس ڈی آئی نا کمک اٹ تفوک آپریشن تھیٹر نا بناءِ کننگ نا وخت آ خیراکن دعا ہم کرے۔