شہید جلیل بادینی نا خون نا برخلاف ریلی،نوشکے ٹی دے نیام آ کشت و خون آتیان الس اٹ گڑتی تالان ءِ

نوشکے، نوشکے شار اٹی ودوک آ بے ایمنی‘ دُزی، داڑیلی، ٹارگٹ کلنگ و اسپورٹس مین ورنا شہید جلیل احمد بادینی نا خون نا برخلاف نوشکے نا ورناک اسہ تاریخی ءُ برانزی ریلی اس اڈ تسر‘ ہراٹی بھلو کچ اسے ٹی ورنا، اسپورٹس مین، سیاسی و راجی راہشون و شاریک بشخ ہلکر۔ ریلی نا شریدار آک نوشکے ٹی امن وایمنی نا خراب حالیت، دُزی، داڑیلی و ٹارگٹ کلنگ نا برخلاف نعرہ خلکر۔ برانزی ریلی جتا جتا شاہراہ تیان مرسا نوشکے پریس کلب نا مون آ سرمس، ہراڑے برانزی مچی اڈ تننگا۔ دا وخت آ میر خورشید جمالدینی، شکیل ثاقب جمالدینی، بیبرگ بلوچ، عطاء اللہ مینگل و ایلو ترانکار آک تران کرسا پاریر کہ اسہ کنڈ آ نوشکے شار انا ہر چار آ کنڈآ فورس آتا ناکہ بندی و سخت چیکنگ نا ردوریسہ برجاءِ وخت اس کہ ایلو کنڈ آ سلہ بند خونی‘ دز وڈوہدار آتے آجوئی دوئی ءِ۔ ترانکار آک پاریر کہ اسپورٹس مین شہید جلیل احمد بادینی، پروفیسر غمخوار حیات و ماسٹر اکرم جمالدینی نا خونی تا داسکان دزگیر مفننگ کانود نافذ کروک ادارہ و حکومتی کارکڑد آ سوجی ٹِک اسے۔ اوفک پاریر کہ نوشکے نا ورناک امن نا خواہندار ءُ و او تینا شار اٹی خلیس و دہشت نا چاگڑد ءِ پین سگنگ کپسہ۔ اوفک حکومت و کانود نافذ کروک ادارہ غاتیان خواست کریر کہ شہید جلیل احمد بادینی نا خونی تتون اوار ایلو خونی تے دزگیر کننگرے، دُزی، داڑیلی و ٹارگٹ کلنگ نا واقعہ غاتے چٹفنگے و شاری تا جان و مال انا رکھ ءِ پک کننگرے۔ ترانکار آک خبردار کریر کہ اگہ حکومت نوشکے ٹی بے ایمنی ءِ چٹفنگ و خونی تا دزگیری کن دمدستی و عملی گام گیج کتو تو السی برانز اٹی پین ترندی اتنگک و ورناک تینا خواست آتا دوئی کن برانز نا دنگ ءِ پین تالان کیرہ۔ (نمائندہ تلار)