بلوچستان اٹ سیکورٹی کاروائی، بھارتی مخ تف 12 دہشتگرد خلنگار،آئی ایس پی آر

سیکورٹی فورس آک 5 و 6 اگست آ بلوچستان نا ضلع واشک و مستونگ اٹی انٹیلی جنس بیسڈ آپریشن کریر، دا کارروائیک “ردِ فتنہ 3” نا رِد اٹ برجا آپریشن نا ریسہ نا بشخ ئسر، ہرانا وخت آ بھارتی مخ تفی اٹ کاریم کروک دہشت گرد آتا برخلاف کارروائی کننگا، آپریشن اٹی 12 دہشت گرد خلنگار۔ آئی ایس پی آر نا رِد اٹ 5 اگست آ، بلوچستان نا ضلع واشک اٹی سیکورٹی فورس آک 6 دہشت گرد نا ہن وبر نا معلومدار کریر و بھرمی کارروائی نا نتیجہ ٹی “فتنہ الہندوستان” تون تعلقدار کل 6 دہشت گرد خلنگار۔ 6 اگست آ بلوچستان نا ضلع مستونگ اٹی انٹیلی جنس بیسڈ اسہ پین آپریشن اسے نا وخت آ، سلہہ بند فوج و دہشت گرد آتا نیام اٹی بھاز سم کاری آن پد 6 دہشت گرد خلنگار۔ دا کارروائی ٹی دہشت گرد آتا اسہ ہند اس ہم بھس کننگا، سیکورٹی فورس و کانود نافذ کروک ادارہ غاک وژن “عزمِ استحکام” نا رِد اٹ ملک آن درملکی مخ تف دہشت گردی نا ناچوڑ نا چٹفنگ کن تینا کارروائی تے برجا تخانو، دا وخت آ صدرِ مملکت آصف علی زرداری بلوچستان نا ضلع واشک و مستونگ اٹی سرسہب انٹیلی جنس بیسڈ آپریشن ردّ الفتنہ 3 آ سیکورٹی فورس آتے خراجِ تحسین پیش کرینے۔ صدرِ مملکت بھارتی کاٹم خواجہی ٹی کاریم کروک فتنہ ہندوستان نا 12 دہشت گرد ءِ خلنگ آ سیکورٹی فورس آتا کسبی لائخی، عزم و مہارت نا سفت ءِ کرے۔ آصف علی زرداری پارے کہ بھارتی کاٹم خواجہی ٹی کاریم کروک دہشت گرد آتا برخلاف سرسہب کارروائیک سیکورٹی فورس آتا عزم و کسبی چاہنداری نا ڈیک ءُ۔ او پارے کہ فتنہ ہندوستان و اونا کمکار آک پاکستان نا امن، سوگوی و شونداری نا دشمن ءُ، اوفتا لغور انگا ارادہ غاتے امر کہ مرے بے سہب کننگک۔ صدرِ مملکت دعا کرے کہ اللہ تعالیٰ پاکستان نا ہر کُنڈ ءِ امن و سوگوی عطا کے و ننا سیکورٹی فورس آتے ہر پڑ آ سرسہبی نصیب کے۔ راولپنڈی، کوہلو/اسلام آباد (آن لائن)