ٹرانسپورٹر آتا روا ویل آتے ریسہ اٹ کرار کرار آ ایسر کننگک ،وزیرِ اعلیٰ میر سرفراز بگٹی

وزیرِاعلیٰ بلوچستان میر سرفراز بگٹی تون پارلیمانی سیکرٹری ٹرانسپورٹ میر لیاقت علی لہڑی نا کماشی ٹی ٹرانسپورٹرزو آل پاکستان مزدا ٹرک گڈز ٹرانسپورٹ ایسوسی ایشن نا نمائندہ غاک اوڑدہی کریر۔ اوڑدہی ٹی صوبہ ٹی ٹرانسپورٹ نا بشخ اٹ مون تروک ویل، قومی شاہراہ تیا امن و ایمنی نا حالیت، واپاری سرجزو مال برداری نا نظام ءِ پین گچین کننگ نا بابت باندات آتیا جم گپ وتران کننگا۔ اوڑدہی ٹی سیکرٹری ٹرانسپورٹ بلوچستان حیات خان، اسپیشل سیکرٹری داخلہ عبدالسلام خان اچکزئی، پرنسپل سیکرٹری وزیرِاعلیٰ عمران زرکون و ایڈیشنل سیکرٹری وزیراعلیٰ محمد فریدون خان اسک ہم ساڑی ئسر۔ ڈل اٹ آل پاکستان مزدا ٹرک گڈز ٹرانسپورٹ ایسوسی ایشن نا چیئرمین میر نواب مینگل تون اوار پنی آٹرانسپورٹر میر دولت خان لہڑی، انجمن تاجران نا نمائندہ رحیم کاکڑ، نور احمد کاکڑ، حاجی یاسین مینگل، نور اللہ ترین، حاجی محمد ابراہیم، آغا داد اللہ، حاجی خلیل، طاہر احمد مینگل و آغا اسک ہم اوار ئسر۔ ڈل وزیراعلیٰ بلوچستان ءِ ٹرانسپورٹر، پوریاگر و گڈز ایسوسی ایشن ءِ مون تروک ویل، شاہراہ تیا ہن و بر اٹی پیش بروک مشکل و ٹرانسپورٹ نا بشخ انا بابت چندی انتظامی باندات آتیان معلومدار کرے۔ دا وخت آ وزیرِاعلیٰ بلوچستان میر سرفراز بگٹی پارے کہ ٹرانسپورٹ نا بشخ صوبہ و ملک انا زرگزران اٹ تمبہ نا حیثیت تخک و حکومت دا بشخ انا ویل آتے ایسر کننگ ءِ اولیت تننگ ءِ۔ او باور کرفے کہ ٹرانسپورٹر آتا روا ویل آتے کرار کرار آ ایسر کننگک و تعلقدار محکمہ غاتے دا بابت المی گام گیج کننگ نا پارت جاری کننگانے۔ وزیرِاعلیٰ پارے کہ قومی شاہراہ تیا امن و ایمنی حکومت نا اولیت ءِ و مسافر، ٹرانسپورٹر و پوریاگرآتے رکھوک چاگڑد تننگ کن کل تعلقدار ادارہ غاتے پبی وڑ اٹ کاریم کننگ نا پارت کننگانے۔ او پارے کہ بلوچستان نا شاہراہ تے رکھ، پرامن و فعال جوڑ کننگ نئے بیرہ الس بلکن واپاری و زرگزرانی سرجزآتا مونی دننگ کن ہم المی ءِ۔ میر سرفراز بگٹی پارے کہ حکومت کل اسٹیک ہولڈر آتتون پدریسہ سلابت نا کمک اٹ ہندن ءُ گام گیج کیک ہراڑان ٹرانسپورٹ نا بشخ ءِ پین سوگو کننگ مرے، کاروباری سرجزآتے شونداری رسینگے و الس ءِ گچین سفر نا آسراتی دو برے۔ ڈل ویل آتا ایسرو ٹرانسپورٹر برادری نا گڑتی تے مر کننگ نا باوری کرفنگ آ وزیرِاعلیٰ بلوچستان نا منت واری ءِ ہرفسا حکومت تون ہر وڑ انا کمک ءِ برجاتخنگ نا عزم انا درشانی ءِ کرے۔