سد آتا کچ اٹ پارٹی ٹی شمولیتی پروگرام است بڈی نا سوب ءِ،میر رحمت صالح بلوچ

نیشنل پارٹی نا بنجائی راہشون و بلوچستان اسمبلی ٹی ڈپٹی پارلیمانی لیڈر میر رحمت صالح بلوچ پنجگور تون تعلقدارجتا جتا سیاسی جماعت آتا پنی آ شخصیت و سد آ کارندہ غاتا نیشنل پارٹی ٹی اوار مننگ نا ستاءِ کرسا اودے بلوچستان نا سیاست اٹی اسہ اہم و ستاکڑزوک ءُ پیش رفت اس گوندانے۔ او آغا شاہ حسین، سعیداللہ، عبدالمجید، شیر احمد رند، داد محمد، عبدالوحید، حاجی ارشاد، اقبال غلام جان، شعیب احمد، علی بخش، محبت خان، مرزا جمیل احمد، شبیر احمد، ڈاکٹر محمد حنیف، سمیع اللہ و اوفتا سد آ سنگت و خاہوت آتے نیشنل پارٹی ٹی اوار مننگ آ است انا ہُب اٹ مبارکبادی ترسا پارے کہ اوفتا دا فیصلہ جوان سیاسی بصیرت، جمہوری شعور و السی فائدہ غا تالان سیاست نا گچین کننگ نا ڈیک ءِ‘ رحمت صالح بلوچ پارے کہ ساڑی سیاسی نااومیتی و بے باوری نا حالیت اٹی سنجیدہ، شرفمند و السی خذمت آ پت تخوک راہشون و کارندہ غاتا نیشنل پارٹی آ پت اصل اٹ جماعت نا اصولی، جمہوری و قومی موقف نا امنائی ءِ‘ او پارے کہ ایہن تو نیشنل پارٹی اقتدار اٹی اف، ولے تینا پدریسہ، پاش و الس دوست سیاست نا سوب آن الس نا است آتیٹی سوگو جاگہ جوڑ کرینے، ہندا سوب ءِ کہ جتا جتا سیاسی جماعت آتیان مخلوق بھلو کچ اسے ٹی دا کاروان نا بشخ جوڑ مننگ اٹی ءِ‘ او پارے کہ دا سیاسی پیش رفت نا بلوچستان نا جم سیاسی چاگڑد آ ہم جوان زہم تمک۔ انتئے کہ ساڑی بے باوری حالیت آتا سوب آن ورنا تیٹی جمہوری و پارلیمانی سیاست آن بددلی ودی مننگ اٹی ءِ‘ دا وڑ انا شمولیت آک اوفتے مثبت، آئینی و جمہوری جہد انا کنڈ آ دیرہ۔ میر رحمت صالح بلوچ اومیت درشان کرے کہ پوسکن اوار مروک راہشون و کارندہ غاک تینا سیاسی لائخی، آزموندہ و السی رابطہ غاتے کاریم اٹ اتسا نیشنل پارٹی ءِ پین فعال، منظم و سوگو جوڑ کننگ اٹی بھرمی کڑد ادا کیرہ۔ او پروگرام اٹی بشخ ہلسا اودے سرسہب کننگ آ پارٹی ڈسٹرکٹ کوئٹہ نا کابینہ نا تینا و پنجگور نا سنگت آتا کنڈ آن منتواری ءِ ہرفسا پارے کہ سنگت آک کاٹم ءِ شرف آن بڑز کریر۔ او پارے کہ نیشنل پارٹی نا صدر ڈاکٹر عبدالمالک بلوچ نا کنڈ آن بنجا ءِ پیش کروک 17 ٹکی ایجنڈا بلوچستان اٹی مدامگی امن، سیاسی سوگوی و مریس مُدی ویل آتا ایسری نا کنجی ءِ۔ اگہ بنجا سنجیدگی، اخلاص و سیاسی بصیرت تون دا ٹِک آتیا عملدرآمد کے تو نئے بیرہ بلوچستان نا حالیت آتیٹی نمان جوانی بریک بلکن الس اٹی تالانی مروک نااومیتی‘ بے باوری و احساسِ محرومی نا ہم بھرمی چٹفنگ مننگ کیک۔ پنجگور (نامہ نگار)