گرلز مڈل اسکول پیرکزی ٹی مسن تا اسکول کن ماڑی تفنگے، سردار یعقوب

چاغی نا قبائلی و سیاسی راہشون سردار محمد یعقوب پیرکزی تینا اسہ بیان اسے ٹی پارینے کہ گرلز مڈل اسکول کلی سردار محمد یعقوب پیرکزی نا مسڑ طالب علم آک بے چھت آن تعلیم دوئی کننگ آ بیوس ءُ۔ او پارے کہ گرلز مڈل اسکول اٹی مسڑ چنا تیکن بیرہ مسہ کمرہ ءُ ہرافک طالب علم آتیکن بھاز کم ءُ ہرانا سوب آن کیہی مسڑ طالب علم آتے پیشن تولسا تعلیم دوئی کروئی تمنگ اٹی ءِ۔ او پارے کہ گرلز مڈل اسکول کلی سردار محمد یعقوب پیرکزی روڈ انا کرّک آٹے‘ اسکول اٹی چاردیوالی مفننگ نا سوب آن طالب علم و مسن تا تعلیم زہمی مننگ اٹی ءِ۔ او ایم پی اے چاغی حاجی صادق خان سنجرانی، ڈی سی چاغی جہانزیب نور شاہوانی و ڈسٹرکٹ ایجوکیشن آفیسر چاغی آن خواست کرے کہ گرلز مڈل اسکول کن دمدستی پوسکن ءُ کمرہ و چاردیوالی تفنگے تانکہ مسڑ چناتے جوان تعلیم دوئی کننگ نا وارخواہی رسینگے۔ چاغی (نامہ نگار)