نائب وزیراعظم اسحاق ڈار اردن نا دارالحکومت عمان آ سرمس

نائب وزیراعظم و وزیر خارجہ سینیٹر محمد اسحاق ڈار اردن نا دارالحکومت عمان آ سرمس، ہراڑے او مقبوضہ بیت المقدس نا بابت اردن نا مہمانداری ٹی اڈ ہلوک وزارتی دیوان اٹ بشخ ہلیک۔ چارشنبے نادے آ دفتر خارجہ نا رداٹ عمان آ سرمننگ آ نائب وزیراعظم ءِ اردن نا وزارت خارجہ و اردنی پردیسی تا باندات نا وزارت نا ڈائریکٹوریٹ انسانی حق انا ڈائریکٹر سجا المجالی، اردن اٹ پاکستان نا سفیر میجر جنرل (ر) خرم سرفراز خان و سفارت خانہ نا کمامدارآک بخیر کریر۔ نائب وزیراعظم چارشنبے نادے آ چندی اہم دیوان تے ٹی بشخ ہلیک ہرافتے ٹی وزارتی دیوان اٹ بشخ ہلنگ، اردن نا شاہ عبداللہ تون اوڑدہی و ایلو ملک آتا وزیر خارجہ غاتتون ہڑتوم آ کنڈآتا اوڑدہی اوار ءِ۔ دا اوڑدہی تیٹی مقبوضہ فلسطینی علاقہ غاتا حالیت، علاقائی باندات و ہڑتوم آ کنڈآتا است خواہی نا باندات آتیا گپ وتران کننگک۔