بلوچستان ہائی کورٹ نا ماڑی نا ودفنگ نا ڈٹ بھاز اہم ءِ،سیکرٹری مواصلات بابر خان

سیکرٹری مواصلات و تعمیرات بلوچستان بابر خان بلوچستان ہائی کورٹ نا ماڑی نا ودفنگ نا ڈٹ انا جم دورہ ءِ کرے و برجا تفوئی سرجز آتا جاچ ءِ ہلک۔ دا وخت آ چیف انجینئر کوئٹہ زون عبدالرحیم بنگلزئی، چیف آرکیٹیکٹ ڈاکٹر سہراب مری، ایگزیکٹو انجینئر بلڈنگ کچلاک ڈویژن عمر منیر تون اوار تعلقدار محکمہ غاتا بڑزکو افسر آک ہم اوار ئسر۔ دورہ نا وخت آ سیکرٹری مواصلات و تعمیرات ءِ ڈٹ انا جم پیش رفت، تفوئی ریسہ، تکنیکی باندات‘ آرکیٹیکچرل ڈیزائن، مون تروک چیلنج و ڈٹ انا پوروی نا سلاہ ئی ٹائم فریم نا بابت سرجم بریفنگ تننگا۔ کمامدار آک ڈٹ آ برجا کاریم، کاریم اٹ اتوک تفوئی آب و بروک آ ریسہ غاتا بابت ہم معلومدار کریر۔ سیکرٹری مواصلات و تعمیرات بابر خان ڈٹ انا جتا جتا بشخ آتا جاچ ءِ ہلسا تفوئی آب، کاریم نا ترندی و دوئی وسیلہ غاتا جاچ ءِ ہلک۔ او تعلقدار افسر آتے پارت کرے کہ ڈٹ انا پوروی ٹی ہچ ءُ وڑ اسے نا ڈیوالئی یا رے تے ہچ وڑ اٹ سگنگ مفک و کل کاریم تے پن کروک شیڈول نا رِد اٹ وخت آ پورو کننگے۔ او پارے کہ بلوچستان ہائی کورٹ نا ماڑی نا ودفنگ نا ڈٹ بے کچ اہمیت تخک ہرا نا پوروی آن عدالت عالیہ ٹی بروک آ سوالی‘ وکیل و عدالتی کارندہ غاتے پوسکنوڑ و جوان آسراتیک دوئی مریک او زور شاغار کہ ڈٹ انا وخت آ پوروی حکومت نا اولیکو اولیت آتیٹی اوار ءِ‘ ہندا سوب آن کل تعلقدار ادارہ غاک تین پہ تینی کمکاری و رابطہ ٹی تینا زمواری تے سر ایتر۔ سیکرٹری مواصلات و تعمیرات سخت پارت کرسا پارے کہ ڈٹ آ کاریم نا ترندی ءِ پین تیز کننگے و تفوئی سرجز آتیٹی ہچ ءُ وڑ اسے نا وقفہ بننگ کن النگپ۔ او پارت کرے کہ ڈٹ آ 24 گھنٹہ نا بنداو آ کاریم برجا تخنگے تانکہ پن کروک وخت اٹ کل ہدف آتے دوئی کننگ مرے۔ او مستی پارے کہ ڈٹ انا پوروی کن دوئی وخت بھاز ءِ ہندا سوب آن کل انجینئرز، افسر و کارندہ غاک تینا پورو لائخی اٹ کاریم کیر۔ او پارے کہ السی فائدہ نا دا اہم انگا ڈٹ اٹی ہچ ءُ وڑ اسے نا سستی، ڈیوالئی یا بے پرواہی سگنگ مفک۔وخت اس کہ تفوئی آب آ ہچ ءُ وڑ اسے نا سمجھوتہ ہم کننگ مفک‘ او تعلقدار کمامدار آتے پارت کرے کہ کاریم نا ترندی و آب انا پدریسہ چاروکی ءِ پک کننگے تانکہ ڈٹ وخت آ و بڑزکو آب انا رِد اٹ پورو مرے۔