نیشنل پارٹی ضلع کوئٹہ نا گچین کاری تا بھلو سیاسی بھرم اس مونی بریک،میر رحمت صالح بلوچ

نیشنل پارٹی نا بنجائی راہشون و بلوچستان اسمبلی ٹی پارٹی نا ڈپٹی پارلیمانی لیڈر میر رحمت صالح بلوچ نیشنل پارٹی ضلع کوئٹہ نا گچین کاری تا ستاءِ کرسا پارینے کہ دا عمل نا بھلا سیاسی زہم نئے بیرہ پارٹی نا تہہ انا پنجر ءِ سوگو کیک بلکن صوبہ نا جم سیاسی چاگڑد آ ہم جوان زہم تمک۔ او پارے کہ نیشنل پارٹی نظریہ و جہد انا بنداو آ جوڑ جماعت اسے، ہرا موروثیت آن پاک ءِ و داٹی عہدیدار آتا گچین کاری پورو جمہوری وڑ و ڈول اٹ کننگک۔ اوپارے کہ پارٹی ٹی کس ءِ پرچی نا کمک اٹ بیٹ کننگپک بلکن کارندہ غاتا سلاہ ءِ اولیت تننگک۔ میر رحمت صالح بلوچ اسہ بھلو وخت اسے آن پد کوئٹہ ٹی ضلعی گچین کاری تا اڈ تننگ نا فیصلہ غا پارٹی نا تعلقدار کمیٹی نا منت واری ءِ ہرفسا پارے کہ دا فیصلہ کارندہ غاتیٹی پوسکن ءُ حوصلہ اس ایتک۔ داڑان ورنا سرکڑدہ غاتے مونی بننگ نا وارخواہی رسینگک و پارٹی گراس روٹ کہول آ پین فعال مریک۔ او پارے کہ نیشنل پارٹی نا مدام دا موقف مسنے کہ تانکہ سیاسی جماعت آتا تہٹی راستی جمہوریت مفک‘ ہمو وخت اسکان ملک اٹی جمہوری اقدار سوگو مفک۔ او کوئٹہ پریس کلب نا انتظامیہ نا ہم منت واری ءِ ہرفے کہ پریس کلب مدام جمہوری عمل نا مخ تفی ءِ کرینے و دا وار ہم پبی کمک فراوان کرے۔ او ضلعی کونسلر آتا کڑد ءِ خراجِ تحسین پیش کرسا پارے کہ گچین کاری ریسہ ناوخت آ کارندہ غاک ہرا نظم و ضبط، سگ و ہم گرنچی نشان تسر او ستا کڑزک۔ او پارے کہ مچ آ عمل اٹی سیوت و ایلمداری نا چاگڑد ئس۔ ہرا نیشنل پارٹی نا سیاسی ہیلکاری نا عملی شاہدی ءِ۔ او نیشنل پارٹی ضلع کوئٹہ نا پوسکن گچین مروک عہدیدار آتے مبارکبادی ترسا صدر حاجی عطاء محمد بنگلزئی، جنرل سیکرٹری عبدالصمد بلوچ، سینئر نائب صدر محمد عارف دہوار، جونیئر نائب میر نصیب اللہ بنگلزئی، زالبول سیکرٹری فریدہ بلوچ، سوشل میڈیا سیکرٹری سعید سمالانی، عوض علی تون اوار کل گچین مروک عہدیدار آتے کن نیک استخواہی تا درشانی ءِ کرے۔ میر رحمت صالح بلوچ نیشنل پارٹی پسنی نا پوسکن گچین مروک عہدیدار آتے ہم مبارکبادی ترسا صدر محسن بھٹو، جنرل سیکرٹری خدابخش سعید، نائب صدر ندیم یاسین، ڈپٹی جنرل سیکرٹری نورامین، سیکرٹری حوالکاری اسماعیل میر، رابطہ سیکرٹری لعل جان یوسف و فنانس سیکرٹری ڈاکٹر واحد بلوچ کن نیک استخواہی تا درشانی ءِ کرے و اومیت درشان کرے کہ او پارٹی ءِ پین سوگو و فعال کننگ کن تینا کڑد ءِ ادا کیرہ۔ پنجگور (نامہ نگار)