ایران آ بھلو جلہو اسے نا ڈٹ ءِ پد بٹینن، دمدستی معاہدہ نا کنڈ آ ہنوئی تمک،امریکی صدر ٹرمپ

امریکی صدر ٹرمپ ویک اینڈ آ ایران آ جلہو آتے پد بٹنگ نا پڑو کرینے۔ سوشل میڈیا غا اسہ بیان اسے ٹی پارے کہ ایران و ڈیہہ انا ایلو ملک آتا خواست آ جلہو ءِ پد بٹینٹ، جلہو نا پد بٹنگ دمدستی معاہدہ تون گنڈوک مریک۔ او پارے کہ زوت معاہدہ پک مس تو پین جلہو مفک۔ اسرائیل ہم جلہو ت پد بٹنگ آ امنا کرینے۔ امریکی صدر دا ہم پارے کہ امریکہ ایران نا برخلاف کارروائی کن پورو وڑ اٹ سنبگرینگوک ءِ‘ او مستی پارے کہ ایران نا برخلاف کارروائی نا واک ننا دوٹی ءِ‘ داکان مست سعودی ولی عہد شہزادہ محمد بن سلمان و امریکہ نا صدر ڈونلڈ ٹرمپ نا نیام اٹ ٹیل فون آ حوال مس۔ سعودی ولی عہد ایران آ امریکہ نا کنڈ آن بھلا جلہو آتا ڈٹ آ گڑتی نا درشانی ءِ کرے۔ درملکی میڈیا نا رِد اٹ دا وخت آ شہزادہ محمد بن سلمان امریکی صدر آن چک و تاڑ اٹ کمتی اتنگ و ایران آ جلہو کپننگ نا خواست کرے۔ میڈیا رپورٹ نا رِد اٹ قطر، متحدہ عرب امارات، ترکیہ و پاکستان ہم امریکہ غا زور شاغنگ اٹی ءُ کہ چک و تاڑ ءِ کم کننگے۔ ایلو کنڈ آ قطری خیرخواہ تا ایرانی وزیرِ خارجہ، ٹرمپ نا نمائندہ خصوصی اسٹیو وٹکوف و عمانی کارندہ تون حوال مسنے۔ داکان بیدس امریکی ویب سائٹ دعویٰ کرینے کہ ہرمز تنک ءِ ملنگ کن معاہدہ کننگ نا کوشست اٹی ہم پیش رفت مسنے۔ داکان بیدس امریکی وزیر خارجہ مارکو روبیو پارینے کہ ایران اٹی حکومت نا بدلی نا مطلب المی وڑ اٹ حکومت نا پورو چٹفنگ اف، بلکن اونا کڑد، وڑوڈول تے ٹی بدلی ءِ۔ امریکی نشریاتی ادارہ فاکس نیوز ءِ تروک آ اسہ انٹرویو اسے ٹی مارکو روبیو پارے کہ مننگ کیک کہ نن حکومت نا بدلی آن پورو واکداری نا چٹفنگ ءِ خنپن، بلکن تینٹ دا نظام نا وڑوڈول اٹ بدلی المی ءِ‘ او پارے کہ ایرانی حکومت نا رویہ مدام درملکی نیام تمنگ و توسیع پسندانہ پالیسی تیا تالان مسنے‘ او بیرہ ایران آ حکمرانی کننگ خواپک بلکن مچ آ ڈیہہ آ تینا زہم و زوراکی ءِ جوڑ کننگ خواہک۔ دا حالیت ءِ بدل مروئی ءِ و اودے بدل کننگ نا اسٹ انگا کسر دادے کہ اوفتیا ہندن زور شاغنگے ہرافتے او مستی سگنگ کپس۔ امریکی وزیر خارجہ پارے کہ حکومت نا بدلی و نظام نا پورو بدلی نا نیام اٹی عملی فرق ساڑی ءِ انتئے کہ اسہ مخصوص معاہدہ اسے نا برخلاف اسہ حکومت اسے نا رویہ ءِ بدل کننگ اسہ ہندن ءُ ریسہ اسے ہرانا ہچ ءُ پاش ءُ گڈیکو ٹک اس مفک۔ مارکو روبیو مستی پارے کہ جوہری معاہدہ کننگ مریک و داڑا عملدرآمد نا پک ہم کننگ مریک ولے اسہ حکومت اسے تینا علاقائی سج پام ءِ النگ آ بیوس کننگ اسہ پدریسہ ریسہ اسے‘ ہندا سوب دا زور انا چٹفنگ کن ہچ ءُ پاش ءُ وخت اس پک کننگ مفک۔