شہید آتا پدخاہوت نا آسراتی کن گام گیج کننگک، وزیر اعلیٰ

وزیراعلیٰ بلوچستان میر سرفراز بگٹی شہید آتا پدخاہوت آتا آسودہی و آسراتی تا عزم انا درشانی ءِ کرسا پاکستان پیپلز پارٹی ہرنائی نا ضلعی جنرل سیکرٹری شہید ملک شینگل نا خاہوت تون کروک قول ءِ عملی دروشم تس۔ وزیراعلیٰ بلوچستان شہید ملک شینگل نا فرزند جنید خان و ایلم ملک اجمل خان ءِ محکمہ کشت وکشار اٹی تعیناتی نا پرمان جاری کرسا تقرری نا آرڈر آتے اوفتے تس۔ دا وخت آ وزیراعلیٰ میر سرفراز بگٹی پارے کہ شہید آتا قربانیک قوم انا میرات ءُ و اوفتا پدخاہوت نا شرف، ولفنگ و بحالی حکومت نا اولیکو زمواری ءِ۔ او پارے کہ حکومت بلوچستان شہید آتا خاہوت آتے ہچ گہس تنیا الیپک و اوفتا ہر وڑ انا کمکاری ءِ برجا تخنگک۔ شہید ملک شینگل نا پدخاہوت وزیراعلیٰ بلوچستان نا منت واری ءِ ہرفسا پارے کہ حکومت سخت انگا ساہت اٹ ننا خاہوت نا سیبو جوڑ مرسا نئے بیرہ تینا قول ءِ پورو کرے بلکن شہید آتا خاہوت نا است بڈی نا اسہ جوان ءُ درور اس ہم جوڑ کرے۔