پنجگور نا سیمی تحصیل پروم اٹی بھلا پر تیان کشارگر تا فصل آک بھس

پنجگور نا سیمی تحصیل پروم اٹی طوفانی تہو و پِر آن بھلو کچ اسے ٹی مالی نسخان مسنے، کشارگر تا سولر پلیٹ و اِلار نا فصل طوفان و پِر انا گواچی مسنے۔ حوال آتا رِد اٹ پنجگور نا تحصیل پروم نا چندی علاقہ غاتیٹی، ہرافتیٹی دز پروم، کلگ کور و ایلو علاقہ غاک اوار ءُ، بھلا ترند انگا طوفان و پِر انا سوب آن کشارگر تا تیار انگا فصل اِلار، پُٹی ءِ سخت نسخان رسینگا و کشارگر تا لکھ آ روپئی نہادی سولر سسٹم آک شدید تہو انا سوب آن پنار، ہرا نا سوب آن غریب کشارگر تے لکھ آ روپئی تا نسخان ہرفوئی تما۔ پروم نا باتی و زہمی کشارگر آک دا رد اٹ ڈپٹی کمشنر و ایلو زموار آتیان خواست کریر کہ دمدستی وڑ اٹ اسہ جاچ ٹیم اس ٹہیفسا علاقائی نسخان تا جاچ ءِ ہلیر و نسخان تا کساس ءِ کرسا زہمی کشارگر تا دمدستی مالی کمک ءِ کیر تاکہ او پین زرگزرانی خواری تیان بچنگ کیر۔ پنجگور (نامہ نگار)