ڈی سی خضدار الس کن واک ٹریک نا بناءِ کرے

شاری تے جانجوڑ سرجز فراوان کننگ کن ڈویژنل پبلک کالج خضدار نا دنگ اٹی واک ٹریک نا باقاعدہ بناءِ کننگا۔ تختی نا مون پاشی ءِ ڈپٹی کمشنر خضدار عبدالرزاق ساسولی کرے۔ دا وخت آ میجر اسرار، چیف آفیسر خضدار وڈیرہ صالح جاموٹ، انجمن تاجران خضدار نا صدر حافظ حمیداللہ مینگل، آل پارٹیز شاری ایکشن کمیٹی خضدار نا چیئرمین بشیر احمد جتک، ایگزیکٹو آفیسرز انجینئر سلیم رزاق عمرانی، انجینئر عبدالرؤف قمبرانی، خضدار پریس کلب نا چیئرمین ایوب بلوچ، ایس ایچ او خضدار سٹی منیر احمد جتک، گورنمنٹ کنٹریکٹر عرفان گنگو، انجینئر یونس رمضان موسیانی، بلدیاتی نمائندہ تنزیل بارانزئی، کریم بلوچ و ایلو شرفمند آک ہم ساڑی ئسر۔ بنا غان پد ڈپٹی کمشنر خضدار عبدالرزاق ساسولی تران کرسا پارے کہ دا واک ٹریک طالب علم‘ ورنا و شاری تے جانجوڑ وڑ و ڈول تینائی کننگ نا وارخواہی فراوان کیک۔