فیفا فٹبال ورلڈ کپ 2026: اسپین ارجنٹینا ءِ کٹسا ارٹمیکو وار عالمی چیمپئن جوڑ مس
Get real time updates directly on you device, subscribe now.
فیفا فٹبال ورلڈ کپ 2026 نا فیصلہ ئی معرکہ ٹی اسپین دفاعی چیمپئن ارجنٹینا ءِ 0-1 اٹ کٹا و ارٹمیکو وار ورلڈ کپ ءِ تینا پن آ کرے۔ نیویارک اٹی گوازی کروک آ دا فیصلہ ئی معرکہ نا اولیکو ہاف انا بنا ٹی اسپین نا ٹیم پبی وڑاٹ دفاعی چیمپئن نا گول آ کیہی جلہو کرے ولے سرسہبی دوئی کننگ کتو۔ دا ہاف اٹی اسپین نا رکھ ہنداخس سوگو ئس کہ ارجنٹینا ءِ حریف ٹیم نا گول آ اسہ شاٹ اس خلنگ نا وارخواہی ہم ملتو۔ وقفہ اسکان ہڑتوم آ ٹیم تا نیام اٹی مقابلہ بیدس گول آن بریبر ئس۔ ارٹمیکو ہاف اٹی ہم ہندا حالیت برجا سلیس، وخت اس کہ گوازی نا پکا وخت ختم مننگ آن مست اسپین نا گوازی گر آ فاؤل کننگ نا سوب آن ریفری ارجنٹینا نا فرنانڈس ءِ ریڈ کارڈ کرے و اودے گراؤنڈ آن پیشن کرے، ہراڑان پد ارجنٹینا ءِ بچوک وخت اٹی 10 گوازی گر تتون گوازی ءِ برجا تخوئی تما۔ ارجنٹینا دا ہاف اٹی ہم اسپین نا گول انا کنڈ آ اسہ شاٹ اس ہم خلنگ کتو و گوازی نا ریگولر ٹائم ہچ ءُ گول اسے آن بیدس ایسر مس۔ ودکی وخت انا اولیکو ہاف اٹی ہم مقابلہ بغیر گول اسے آن بریبر سلیس، ولدا ودکی وخت انا ارٹمیکو و فیصلہ ئی ہاف نا بنا ٹی اسپینش گوازی گر فیرن ٹوریس ءِ گول کننگ نا جوان ءُ وارخواہی اس ملا ہراٹی او گول کرسا تینا ٹیم ءِ سرسہب کرے۔