وزیراعلیٰ نا پرمان آ کچ مانگی نا ریونیو ویل آتا ایسری کن کمیٹی جوڑ
Get real time updates directly on you device, subscribe now.
وزیراعلیٰ بلوچستان میر سرفراز بگٹی نا پرمان آ کچ مانگی نا علاقہ نا بابت ریونیو و ڈغار نا مستین نا ویل آتا ایسری کن اسہ بڑزکو کہولی کمیٹی اس ٹہیفنگانے۔ سروسز اینڈ جنرل ایڈمنسٹریشن ڈیپارٹمنٹ نا کنڈ آن جاری مروک اعلامیہ نا رِد اٹ کمیٹی نا جوڑ کننگ کچ مانگی انا ریونیو باندات آتا سرجم جاچ ءِ ہلنگ و اوفتا ایسری کن سلاہ مچ کننگ نا مسخت کن کننگانے۔اعلامیہ نا رِد اٹ کمیٹی نا چیئرمین وزیر بورڈ آف ریونیو مریک‘ وخت اس کہ کمیٹی نا باسک آتیٹی کمشنر سبی، ڈپٹی کمشنر زیارت، ڈائریکٹر جنرل مائنز اینڈ منرلز، سینئر ممبر بورڈ آف ریونیو نا نمائندہ غاک و کچ مانگی علاقہ نا مسہ ہندی نمائندہ اوار مریرہ۔ کمیٹی کچ مانگی نا علاقہ ٹی ریونیو، ڈغار و ایلو تعلقدار باندات آتا سرجم جاچ ءِ ہلیک و کل پہلو تے مون آ تخسا عمل نا قابل سلاہ تے مچ کیک۔ حکومتِ بلوچستان نا رِد اٹ کمیٹی 15 دے اٹ تینا رپورٹ و سلاہ تے حکومت ءِ پیش کیک تانکہ دا باندات آ شفاف، بھرمی و مدامگی بنداو آ فیصلہ کننگ مرے۔