پاکستان نا موقف پیدوا رءِ اوغانستان نا ڈغار ننا برخلاف کاریم اٹ اتنگ انگ ءِ، وزیر داخلہ بلوچستان میر ضیاء اللہ لانگو
اوغانستان ننا ایلم اسلامی ملک ءِ، نن اسلامی ربیدگی رشتہ غاتیٹ گنڈوک اُن، بایدے ننا برخلاف سازش کپ، بھارت پاکستان نا درسر اسے آن دشمن ءِ، او ہچ ءُ وارخواہی اس دُو آن دننگ کن الیپک
Get real time updates directly on you device, subscribe now.
صوبائی وزیرداخلہ میر ضیاء اللہ لانگو پارینے کہ بلوچستان اٹی دہشت گردی نا واقعہ غاتیٹی کیہی وڑک کاریم اٹ اتنگ انگ ءُ، اوغانستان و ایران تون اسہ مُرغن ءُ سیم اسے‘ ہراکان بندغ آک آسانی اٹ آ ہن بر کیرہ۔ دہشت گردی نا بابت پاکستان نا موقف بھاز پیدوار ءِ کہ طالبان بلوچ دہشت گرد تنظیم آتا کمک و انڈیا دہشت گرد آتے فنڈنگ کننگ اٹی ءِ و اوغانستان نا ڈغار ننا برخلاف کاریم اٹ اتنگ انگ ءِ۔ پاکستان پدریسہ جتا جتا قومی و جہانی فورم تیٹی اوغانستان آن خواست کرینے کہ اوغانستان ننا ایلم اسلامی ملک ءِ‘ ننا و اونا اسلامی ربیدگی رشتہ غاک ءُ، ننا ڈغار نا برخلاف سازش نا بشخ جوڑ مف۔ بھارت پاکستان نا درسر اسے آن دشمن ءِ و او ہچ ءُ وارخواہی اس دُو آن دننگ کن الیپک۔ حکومت سانحہ اوڑک و زیارت نا زموار آتے اوفتا ایسر اسکان سر کیک۔ دا ہیت ءِ او درملکی میڈیا تون ہیت و گپ کرسا کرے۔ وزیرداخلہ میر ضیاء اللہ لانگو پارے کہ منہ وخت آن طالبانک شعبان و ایلو علاقہ غاتیٹی بسر و داڑے قبائلی بندغ آتے تنک کریر کہ دا علاقہ غاتے خالی کیر تانکہ نن داڑے بننگ کین، کوئٹہ و ایلو علاقہ غاتیٹی دہشت گردی کین۔ دہشت گرد آک ہندی بندغ آتے تنک کریر و منہ بندغ ءِ خلکر ہم۔ صوبائی حکومت وخت زیان کننگ آن مست دہشت گرد آتا برخلاف ایکشن ہلنگ نا فیصلہ کرے، وزیراعلیٰ نا پارت آ ای ایف سی و سیکورٹی فورس آتتون اوار علاقہ غا ہناٹ و حالیت آتا جاچ ءِ ہلکٹ۔ زیارت و ہنہ اوڑک نا واقعہ غاتیان پد صوبائی حکومت زہمی خاہوت آتتون پدریسہ رابطہ ٹی ءِ و و اوفتے باور کرفینے کہ حکومت اوفتے رکھ، شہید آتا خاہوت آتے زرتس و چنا تا ولفنگ ءِ پک کیک۔ اوکان پد زیارت نا است ہسون واقعہ مون آ بس و زیارت ہنسا خنان کہ پولیس نا ورناتے شہید کننگانے۔ ہند آ سر مننگ آن پد دیوان اڈ ہلک و پولیس افسر آتا ہیت آتے بنگن۔ وزیراعلیٰ و وزیرک دورہ کریر و جنازہ غاتیٹی بشخ ہلکر۔ ہندی بندغ و زہمی خاہوت آک افسر آتا ڈیوالئی نا غاو کریر، حکومت نئے بیرہ بڑزکو افسر ءِ معطل کرے بلکہ اسہ بڑزکو کہولی انکوائری کمیٹی اس ہم جوڑ کرے۔ او پارے کہ ہراڑے دھرنا نا ہیت ءِ‘ دا سیاسی جماعت و زہمی خاہوت آتا جمہوری حق ءِ‘ اوفتتون بیدادی مسنے و نن اوفتتون پدریسہ رابطہ ٹی اُن، اوفتا ویل آتا جاچ ءِ ہلنگانے و اوفتیا سجفنگ انگ ءِ۔ شہید آک ننا ءُ، اوفتتون سلوک اُن‘ ہچ ءُ گڑاس ڈکپنہ‘ اوفتتون جوڈیشل کمیشن آ امنا کرسا کمیٹی جوڑ کننگانے۔ شہید آتا زرتس نا آرڈر ہم جاری کننگانے۔ دا بیدادی نا برخلاف ہر دنگ اسکان ہنسا جاست پاست کننگک و ززموار آتے اوفتا ایسر اسکان سر کننگک۔ او پارے کہ برانز ضرور کیر ولے لاش تیا سیاست کپس۔ سیکورٹی فورس آک دہشت گرد آتا برخلاف کارروائی کننگ اٹی ءُ، علاقہ ٹی آپریشن برجا ءِ و داتم اسکان 126 نا کچ دہشت گرد آتے خلنگانے۔ اسہ سیکورٹی کارندہ اس شہید و 8 ٹھپی مسنو۔ نن و اوغانستان اسہ ایلو نا ہمسائے ملک اُن و اسہ ایلو نا نفع و نسخان آن پیشن مننگ کپنہ۔