مستونگ نا دنگ و قلات ڈویژن نا پن ءِ چٹفنگ ءِ اسُل منپنہ،نواب اسلم رئیسانی

مسکوہی وزیراعلیٰ بلوچستان و صوبائی اسمبلی نا باسک چیف آف ساراوان نواب محمد اسلم خان رئیسانی حکومت نا کنڈ آن مستونگ ءِ کوئٹہ و ضلع کچھی ءِ سبی ڈویژن اٹی اوار کننگ و قلات ڈویژن ءِ چٹفنگ نا مذمت ءِ کرسا دا الس دشمن گام گیج و پالیسی تا برخلاف کانودی کارروائی کننگ نا پڑو کرسا پارینے کہ دا گام گیج آن مست ہچ ءُ فورم اسے و نئے الس ءِ و نئے السی نمائندہ اسے تون سلاہ کننگانے ہراکہ لینڈ ریونیو ایکٹ 1967 نا دفعہ 4، 5 و 6 (الف) نا خلاف ورزی ءِ۔ دا خیال آتا درشانی ءِ او تدوک آ دے اڈ ہلوک دیوان نا کماشی ءِ کرسا کرے۔ دیوان اٹی چیف آف بیرک نواب محمد خان شاہوانی، سردار عاصم جان سرپرہ، پنی آ وکیل ریاض احمد ایڈووکیٹ، عتیق احمد خان ایڈووکیٹ، غلام رسول لہڑی ایڈووکیٹ، محی الدین خان ایڈووکیٹ و ایلوفک بشخ ہلکر۔ دیوان اٹی ضلع مستونگ ءِ کوئٹہ ڈویژن و ضلع کچھی ءِ سبی ڈویژن اٹی اوار کننگ و قلات ڈویژن ءِ چٹفنگ نا حکومتی گام گیج نا سخت انگا لوز آتے ٹی مذمت کننگا۔ نواب اسلم خان رئیسانی حکومتی گام گیج ءِ بدنیتی، بھازخارتس و الس و بلوچستان دشمن گوندا۔ دیوان اٹی پاننگا کہ مستونگ تاریخی، ربیدہ ئی‘ سیاسی، قومی و جغرافیائی لحاظ اٹ قلات نا بشخ و جتا مفروک ٹکر مسنے‘ ہرادے السی گچین کپروک حکومت اسے چٹفنگ نا ہچ ءُ واک یا تک اس اف‘ جواز اف، وخت اس کہ قلات نا تینا سد سال آ مستین نا تاریخ ءِ و قلات ڈویژن ءِ چٹفنگ اسہ بھلو سازش و خطرناک ءُ ڈٹ اسے۔ دیوان اٹی گڑتی نا درشانی ءِ کرسا پاننگا کہ مقتدرہ و ساڑی حکومت بلوچستان نا تاریخی میرات و روایات، زبان و دود ربیدہ و جغرافیہ تون مہر اف۔ بلوچستان مہالو آن بیڈ گورننس آن زہمی ءِ‘ الس نا خواست آتیانا چَپ گام گیج آک الس اٹی خار ءِ پین ودفرہ۔ دنیا ٹی حکومت آک الس کن آسودہی ودی کیرہ و اوفتا شناخت نا شرف ءِ کیرہ، ولے دا جاگہ نا حکمران آتے الس نا زبان، دود ربیدہ‘ و تاریخ تون ویل ودشمنی ءِ۔ قلات، مستونگ و کچھی نا تاریخ و السی خواست آتے لتاڑ کننگ بیرہ انتظامی ویل اس اف بلکہ دا علاقہ غاتتون ننا پجار‘ شناخت و تاریخ گنڈوک ءِ‘ دیوان اٹی امنا کننگا کہ دا الس دشمن گام گیج نا برخلاف کانودی جنگ کننگک۔