حکومت شونداری ڈٹ آتا بھرم ءِ الس اسکان سر کننگ نا خواہندار ءِ،چیف سیکرٹری بلوچستان

چیف سیکرٹری بلوچستان شکیل قادر خان تون پنی آ زرگزرانی چاہندار ڈاکٹر قیصر بنگالی اوڑدہی کرے، اوڑدہی ٹی صوبہ ٹی غریبی ٹی کمتی، روزگار نا شون، بنداوی آسراتی تا فراوانی و ریجنل گروتھ سینٹر جوڑ کننگ و سوگوی تون تعلقدار چندی باندات آتیا جم گپ و تران کننگا۔ دا وخت آ کل انتظامی سیکرٹریک ہم ساڑی ئسر۔ اوڑدہی ناوخت آ صوبائی حکومت نا کنڈ آن السی آسودہی، زرگزرانی گچینی و مدامگی شونداری کن برجا گام گیج آتیا ہیت و گپ مس۔ چیف سیکرٹری بلوچستان شکیل قادر خان پارے کہ صوبائی حکومت الس ءِ روزگار نا فراوانی، الس نا بنداوی گرج آتیا رسینگ گیگ، حکومت نا کنڈ آن ضلعی شونداری ڈٹ، ضلعی لائیولی ہوڈ پروگرام، و پدتموک علاقہ غاتیٹی شونداری عمل ءِ ترند کننگ کن سنجیدہ و عملی گام گیج کننگ اٹی ءِ۔ او پارے کہ حکومت نا ہدف بیرہ شونداری ڈٹ آتا بنا کننگ آخا بلکن اوفتا بھرم آتے لس شاری تسکان سر کننگ ءِ۔ او مستی پارے کہ بلوچستان اٹی غریبی نا چٹفنگ کن گچین پالیسی، ہندی کہول آ زرگزرانی سرجز آتا شون تنن، کسبکاری نا ہیلکاری و چنکا و نیامی کہول انا پوریاگر آتا است بڈی المی ءِ۔ چیف سیکرٹری دا ہیت آ ہم زور شاغا کہ صوبہ نا جتا جتا ضلع غاتیٹی ریجنل گروتھ سینٹر جوڑ کننگ آن ہندی زرگزران ءِ سوگوی رسینگک‘ زرکاری ودک و روزگار نا پوسکن آ وارخواہیک ودی مریرہ۔ دا وخت آ ڈاکٹر قیصر بنگالی بلوچستان نا زرگزرانی حالیت، شونداری گمان و زرکاری نا وارخواہی تا بابت ہیت و گپ کرسا پارے کہ صوبہ ٹی بھلا بھلا ڈٹ آتیٹی زرکاری نا پبی گرج ارے تانکہ مدامگی شونداری نا بنداو تخنگ مرے۔ او پارے کہ بلوچستان نا قدرتی وسیلہ، جغرافیائی اہمیت، کرکی پٹی، معدنی مڈی و کشاری گمان تے بھرمی وڑاٹ ڈٹ بندی نا کمک اٹ شونداری عمل اٹی اتنگے۔ ڈاکٹر قیصر بنگالی مستی پارے کہ اگہ صوبہ ٹی انفراسٹرکچر، توانائی، کشت وکشار‘ لائیوسٹاک، معدنیات، ٹرانسپورٹ و صنعتی بشخ آتیٹی بھلا زرکار آتے مونی اتنگا تو نئے بیرہ زرگزرانی سرجز آک ودرہ بلکن روزگار نا بھلو وارخواہی ہم ودی مریک۔