چاغی ٹی نشئی تا کچ اٹی ودکی آن الس فریشان، کمامدار آک نوٹس ہلیر

چاغی شار اٹی نشئی بندغ آتا کچ اٹی ودکی آن الس بھاز فریشان ءِ‘ کمامدار آک نوٹس ہلیر۔ حوال نا رِد اٹ چاغی نا بازار متکن آ قصاب گلی ٹی ہیرون، کرسٹل و ایلو منشیات آسانی اٹ دوئی مریک‘ چاغی شار انا کلی و بازار اٹی منشیات بہا مننگ اٹی ءِ و سوج کروک کس اس اف۔ چاغی ٹی نشئی بندغ آتا کچ اٹی ہڑدے ودکی مننگ اٹی ءِ و داسہ نشئی تا کچ سَد آتے ٹی ءِ‘ ہرافک جتا جتا ٹولی تا دروشم اٹی بازار و کلی تا ایب کیب گشت کرسا خننگرہ۔ منشیات نا ہیلاک بندغ آک دوکان تیان بیدس اُرا‘ مسیت آتیان ہم دزی کننگ اٹی ءُ۔ السی تپہ غاک چاغی پولیس آن خواست کرینو کہ چاغی ٹی منشیات نا اڈہ غاتے دمدستی چٹفنگے تانکہ ورنا چین منشیات نا دا ناچوڑ آن بچنگ کے و نشئی بندغ آتے دزگیر کرسا کوئٹہ غا گدریفنگے تانکہ اوفتا ہسپتال آتیٹی درمان مننگ کے۔