کشمیر ی الس تینا بنداوی حق آتے کن گیرام مفروک قربانی تسنے،اسپیکر قومی اسمبلی

اسپیکر قومی اسمبلی سردار ایاز صادق کشمیر نا شہید آتے خراجِ عقیدت پیش کرسا پارینے کہ کشمیری الس ہفت دہائی آن زیات وخت انا جہد اٹی تینا بنداوی حق و تینا وتواجہی نا حقِ انا دوئی کن گیرام مفروک قربانی تسنے ہرافتے تاریخ اٹ مدام شرف و عقیدت اٹ یات تخنگک۔ یومِ شہدائے کشمیر نا وخت آ تینا کلہو اٹ او پارے کہ کشمیری شہید آک حق، انصاف و انسانی وقار کن تینا جان تے ندر کرسا تاریخ اٹ گیرام مفروک بشخ اس نوشتہ کریر۔ سردار ایاز صادق پارے کہ یومِ شہدائے کشمیر 13 جولائی 1931ء نا ہمو تاریخی واقعہ نا یات اٹ اڈ تننگک ہراتم سرینگر سینٹرل جیل انا پیشن آ ڈوگرہ راج انا برخلاف برانزکروک آ کودک کشمیری تیا سم کاری کننگا ہراڑان 22 کشمیری شہید مسر، دا شہید آتا قربانی کشمیری الس نا وتواجہی نا حقِ انا جہد ءِ پوسکن ءُ کسر اس تس۔ او پارے کہ یومِ شہدائے کشمیر ننے کشمیری شہید آتا قربانی تے یات کننگ و حق، انصاف و انسانی وقار نا اصول آتے کن تینا عزم ءِ پین سوگو کننگ نا وار اس فراوان کیک۔ او پارے کہ کشمیری الس مشکل آتیان پد ہم ہرا عزم، حوصلہ و ثابت قدمی نا درشانی کرے او جیرت و استقامت نا درور ءِ۔ اسپیکر قومی اسمبلی پارے کہ پاکستان مدام کشمیری الس نا روا جہد انا مخ تفی ءِ کرینے و اوفتا وتواجہی نا حقِ اکن قومی و جہانی کہول آ توار بڑز کرینے، او پارے کہ پاکستان نا پارلیمان ہم دا بابت تینا گچین کڑد ادا کرسا مقبوضہ جموں و کشمیر اٹ انسانی حق آتا خلاف ورزی تا برخلاف چندی امنائی قرارداد منظور کرسا جہانی برادری نا چکار ءِ جموں و کشمیر نا ویل انا کنڈ آ کرفینے، او پارے کہ جموں و کشمیر نا ویل انا انصاف اٹ و پُرامن ایسر ی کن پاکستان نا پارلیمان انسانی حق، انصاف و امن نا اصول آتا رداٹ تینا کڑد ءِ برجاتخک۔ اسپیکر قومی اسمبلی پارے کہ مسئلہ جموں و کشمیر نا اقوامِ متحدہ نا سلامتی کونسل نا تعلقدار قرارداد و کشمیری الس نا است خواہی تا رداٹ انصاف اٹ ایسری سویلی ایشیا ٹی مدامگی امن کن المی ءِ۔ او جہانی برادری آ جموں و کشمیر نا ویل انا ایسری کن تینا زمواری تے ادا کننگ، مقبوضہ جموں و کشمیر اٹ انسانی حق آتا لتاڑ تا سنجیدگی اٹ نوٹس ءِ ہلنگ، کشمیری الس نا بنداوی حق و تواجہی ناحقِ انا شرف ءِ پک کننگ کن گچین کڑد ادا کننگ کن زور شاغا۔