اسلام، زالبول آتا عزت، حق و راج اٹی گچین کڑد ءِ امنا کرفے،بنجائی وزیر کانود و انصاف

بنجائی وزیر کانود و انصاف و انسانی حق، سینیٹر اعظم نذیر تارڑ پارینے کہ زالبول آتے واکدار جوڑ کننگ بیرہ راجی گرج اس اف بلکہ زرگزرانی شونداری نا المی شڑت، گچین حکمرانی نا اولیت و مدامگی شونداری نا بنداوی اساس ءِ، اسلامی کمکارتنظیم (او آئی سی) ننے اسہ یکتا ءُ پلیٹ فارم اس فراوان کیک ہراڑے نن اسیجائی است خواہی تے اجتماعی و گچین گام گیج آتیٹی بدل کننگ کینہ۔ دا خیال آتا درشانی ءِ او دوشنبے نادے آ او آئی سی نا زالبول آتا ”9 می وزارتی کانفرنس” آن تران کرسا کرے۔ کانفرنس اٹی چیئرمین سینیٹ سید یوسف رضا گیلانی، بنجائی وزیر آک، ڈل آتا سروک، جہانی تنظیم آتا نمائندہ و سفارتی کور انا باسک آک بشخ ہلکر۔ بنجائی وزیر انسانی حق اعظم نذیر تارڑ تران کرسا پارے کہ اسلامی کمکارتنظیم (او آئی سی) نا زالبول آتابابت 9 می وزارتی کانفرنس نا مندوب آتے اسلام آباد اٹ بخیر اٹ پاننگ شرف و خوشی نا سوب ءِ۔ او پارے کہ اینو نن داڑے بیرہ تینا تینا باسک ملک آتا نمائندہ غاتا حیثیت اٹ اوار مسونن بلکن اسہ اسیجائی وژن اسے نا امین جوڑ مرسا یکجا مسونن، اسہ ہندن ءُ آخبت اسے کن ہراڑے ہر زالبول ءِ سروکی کننگ، پوسکنوڑ ودی کننگ و مسلم دنیا نا شونداری و شونہالی ٹی پبی کڑد ادا کننگ نا اسہ وڑ وارخواہی دوئی مرے۔ او پارے کہ حکومت پاکستان و پاکستانی الس نا کنڈآن ای غٹ شرفدار آ ڈل آتے بخیر اٹ پاوہ۔ پاکستان کن دا گمر نا سوب ءِ کہ اودے دا اہم کانفرنس نا مہمانداری و کماشی نا شرف رسینگانے، نن دا زمواری ءِ عاجزی، زمواری نا احساس و دا پکا عزم اتون امنا کینہ کہ او آئی سی نا غٹ 57 باسک ملک آتا خذمت شریداری، شمولیت و تین پہ تینی امنائی سلاہ نا جوزہ نا رداٹ کینہ۔ او پارے کہ نن تینا اسیجائی جہد انا اسہ بھاز اہم موڑ اسے آ سلوک اُن۔ او آئی سی نا چندی ملک آتیٹی زالبول آک زرگزران آتے سوگو کننگ ءُ، سائنسی شونداری ٹی نما ن کڑد ادا کننگ ءُ، ادارہ غاتے سوگو کننگ ءُ، کاروباری دنیا نا سروکی ءِ کننگ ءُ، سرکاری منصب آتیٹی خذمت سرتننگ ءُ و امن و انسانی ہمدردی نا کوشست آتیٹی پورو بشخ ہلنگ ءُ۔ او پارے کہ اوفتا سرسہبی سوگو خاہوت، زیات بود تخوک راج و شونہال قوم تا جوڑ کننگ اٹ اہم کڑد ادا کننگ ءُ۔