اسلامی دنیا گام گیج آتا کمک اٹ زالبول آتے وارخواہی فراوان کے،چیئرمین سینیٹ

چیئرمین سینیٹ سید یوسف رضا گیلانی اسلامی دنیا غا زور شاغا نے کہ او زالبول آتے زرگزرانی وڑاٹ واکدار کننگ کن بیرہ پڑو آتا دنگ اسکان آخا بلکن عملی و مدامگی گام گیج آتا کمک اٹ زالبول آتے شونداری نا قومی دنگ اٹ گچین کڑد ادا کننگ نا وارخواہی فراوان کیر، زالبول آتے واکدار جوڑ کننگ نئے بیرہ مدامگی شونداری کن المی ءِ بلکن دا اسلام نا بنداوی تعلیم و اجتماعی زمواری نا خواست ہم ارے۔ دا خیال آتا درشانی او دوشنبے نادے آ زالبول آتا بارواٹ 9 می او آئی سی وزارتی کانفرنس اٹ خاص انگا مہمان نا وڑ اٹ تران کرسا کرے۔ چیئرمین سینیٹ او آئی سی نا باسک ملک آتا وزیر، مندوب، پارلیمنٹیرین و شرفمند مہمان تے پاکستان آ بننگ آ بخیرکرسا پارے کہ اسلام چانڑدہ سد سال مست زالبول آتے تعلیم، میرات، زرگزرانی سرجز و راجی وقار نا حق ترسا اوفتے عزت، بریبری و انصاف نا ہمو ہند ءِ تس ہرانا دنیا ٹی درور ملپک۔ او پارے کہ قرآن مجید و اسوہ رسول اکرم ﷺ زالبول آتا شرف، سرکڑدہ ئی، علم و راجی کڑد انا روشن نمونہ پیش کیرہ۔ اوپارے کہ ”مدامگی شونداری کن زالبول آتا زرگزرانی سوگوی“ بیرہ اسہ کانفرنس اسے نا سرحال اف بلکن مسلم دنیا نا روشنا آخبت نا بنداو ءِ۔ اومسلم زالبول آتا تعلیم، واپار، سائنس، سفارتکاری، سیاست، راجی خذمت و سرکڑدہ ئی نا بشخ آتیٹی نمان خذمت آتے خراج تحسین پیش کرسا پارے کہ مسلمان زالبول آک ہردور اٹی تہذیب آتا جوڑ کننگ و راج آتا شونداری ٹی اہم کڑد ادا کرینو۔ سید یوسف رضاگیلانی شہیدگودی بینظیر بھٹو ءِ خراج عقیدت پیش کرسا پارے کہ او نئے بیرہ پاکستان بلکن مچ آ مسلم دنیانا اولیکو زالبول وزیراعظم ئس، ہرازالبول آتا حق، جمہوریت و بریبر وارخواہی تیکن تاریخی جہد کرے۔ اوپارے کہ اینو مسلم دنیا نا زالبول آک شہید گودی بینظیر بھٹو نا وژن و مشن ءِ مونی درسا قومی، علاقائی و جہانی کہول آ نمان سرسہبی دوئی کننگ ءُ۔