امریکی سینٹرل کمانڈ نا ایران آ جلہو آتا پوسکن آ ریسہ، قبرص نا جہاز آ جلہو نا ورندی ٹی کارروائی کننگا

واشنگٹن امریکی سینٹرل کمانڈ (سینیٹکام) پارینے کہ ایران نا برخلاف جلہو آتا اسہ پوسکن ءُ ریسہ اسے نا بناءِ کرینو۔ دا کارروائی پاسدارانِ انقلاب نا کنڈ آن قبرص نا کنٹینر بردار جہاز آ جلہو آن پد کننگ انگ اٹی اے۔ سینیٹکام نا رِد اٹ ایرانی جلہو آن پد عملہ نا اسہ باسک اس گوہنگوک اے۔ جہاز اٹ خاخر لگا وبھلو نسخان اس رسینگا، ہراڑان جہاز تینا کسر ءِ برجا تخنگ کپک۔ امریکی سینٹرل کمانڈ نا پاننگ ءِ کہ ایران ءِ داڑان مست ہم واپاری جہاز آتیا جلہو آن پد تینا وڑ و ڈول ءِ جوان کننگ و مفاہمتی یادداشت (ایم او یو) نا پاسداری کن وارخواہی تننگاسس، ولے ایران اسہ وار ولدا داٹی بے سہب مس۔ سینیٹکام مستی پارے کہ دا جلہو آک امریکی صدر نا پارت آ کننگ انگ اٹی ءُ۔ایلو کنڈ آ یو کے میری ٹائم ٹریڈ آپریشنز ایجنسی نا پاننگ ءِ کہ اودے عمان آن 9 ناٹیکل میل مشرق اٹی اسہ واقعہ نا حوال ملانے۔ یات مرے کہ ایران نا پاسدارانِ انقلاب نا بحریہ آبنائے ہرمز ءِ تا حکمِ ثانی بند کننگ نا پڑو کرینے۔