بلوچستان داسہ 11 ڈویژن و 41 ضلع

کوئٹہ: بلوچستان حکومت نا کنڈ آن پوسکن آ ڈویژن و پوسکن آ ضلع غاتا جوڑ کننگ نا نوٹیفکیشن جاری کننگانے۔ صوبائی حکومت نا کنڈ آن شین تروک آ پڑو (نوٹیفکیشن) نا رِد اٹ بلوچستان داسہ 11 ڈویژنز و 41 ضلع غاتیا تالان مریک۔ پڑو نا رِد اٹ 11 ڈویژنز اٹی کوئٹہ، رخشان، مکران، نصیر آباد، ژوب، لورالائی، کوہ سلیمان، پشین، لسبیلہ، سیوی و خضدار اوار ءُ۔ نوٹیفکیشن نا رِد اٹ کوئٹہ ڈویژن داسہ مسہ ضلع غاتیا تالان مریک، ضلع مستونگ ءِ قلات ڈویژن آن جتا کرسا کوئٹہ ٹی اوار کننگانے و ضلع کوئٹہ ءِ اِرا ضلع غاتیٹی بشخ و بانٹ کننگانے ہرا کوئٹہ ایسٹ (دے ٹِک) و کوئٹہ ویسٹ (دیکی) ضلع غاتیا تالان مریک۔ کوئٹہ ایسٹ اٹی سریاب، صدر و سٹی سب ڈویژنز اوار کننگانو وخت اس کہ کوئٹہ ویسٹ اٹی کچلاک، بروری و پنجپائی سب ڈویژنز اوار کننگانو۔بلوچستان حکومت قلات ڈویژن ءِ چٹفسا اِرا پوسکن آ ڈویژن خضدار و لسبیلہ جوڑ کرے، خضدار ڈویژن خضدار، قلات، سوراب و پوسکن آ ضلع وڈھ آ تالان مریک وخت اس کہ لسبیلہ ڈویژن اٹی لسبیلہ، حب و آواران ضلع غاک اوار مریرہ۔ پشین نا پوسکن آ ڈویژن قلعہ عبداللہ، پشین، چمن و پوسکن آ ضلع برشور آ تالان مریک۔ حکومتِ بلوچستان سبی ڈویژن نا پن ءِ بدل کرسا سیوی تخانے و سیوی ڈویژن سیوی، ڈیرہ بگٹی ساؤتھ (سویلی) و کچھی ضلع غاتیا تالان مریک۔