بحرین و کویت ا ٓایرانی جلہو ریاستی وتواجہی کانود نا خلاف ورزی ءِ،سعودی عرب وزارت خارجہ

سعودی عرب کویت و بحرین آ ایران نا وار وار جلہو آتا سخت مذمت ءِ کرینے، اوفتے ریاستی وتواجہی و جہانی کانود نا خلاف ورزی گوندانے۔ سرکاری خبر رساں ایجنسی ایس پی اے نا رداٹ وزارت خارجہ تینا بیان اٹ ایران ءِ اونا پدریسہ جارحیت نا زموار گوندانے، و ڈیہہ انا سلامتی و سوگوی ءِ برجا تخنگ کن دا خلاف ورزی تے زوت بند کننگ نا خواست کرینے۔ سعودی عرب کویت و بحرین تون یکجہتی نا درشانی ءِ کرینے، و تینا وتواجہی نا رکھ اکن چست کروک کل گام گیج آتا مخ تفی نا درشانی ءِ کرے۔ یات سلے کہ ایران نا پاسدارانِ انقلاب فورس دعویٰ کریسس کہ او چارشنبے نادے آ بحرین و کویت اٹ امریکہ نا فوجی میرات آتے شست کرینے۔ کویت و بحرین نا پاننگ ئس کہ اونا فضائی دفاعی نظام ’دشمن‘ نا میزائل و ڈرون جلہو آتتون مون تننگ ءِ، داکان بیدس سویلی سوڈان نا صدر سلوا کیر مایارڈٹ جوبا نا صدارتی ماڑی ٹی سعودی نائب وزیر خارجہ انجینئر عبدالکریم الخریجی ءِ بخیر کرے۔ ایس پی اے نا رداٹ سعودی نائب وزیر خارجہ سعودی سروک نا کنڈآن کلہو ءِ سر کرے و پدریسہ شونداری و شونہالی نا است خواہی نا درشانی ءِ کرے۔ اوڑدہی ٹی سعودی عرب و سویلی سوڈان نا تعلقداری و ساڑی جہانی حالیت آتا اولسر جاچ ہلنگا۔ سعودی وزیر سویلی سوڈان نا وزیر خارجہ جیمز پیٹا مورگن و قومی سلامتی نا بابت صدارتی سلاہکار تون ہم اوڑدہی کرے، ہراٹی ہڑتوم آ کنڈآتا تعلقداری، اہم علاقائی و جہانی باندات آتیا گپ و تران کننگا۔ دا وخت آ وزارت خارجہ ٹی افریقی باندات نا جنرل ڈیپارٹمنٹ نا ڈائریکٹر جنرل صقر القرشی ہم ساڑی ئس۔ یات سلے کہ سعودی نائب وزیر خارجہ انجینئر عبدالکریم الخریجی سویلی سوڈان نا سرکاری دورہ غا جوبا غا سرمسنے۔