پاکستان اٹ عدالتی نظام آ السی پتداری ءِ ودفنگ بھاز اہم ءِ،چیف جسٹس سپریم کورٹ

چیف جسٹس آف پاکستان آن مسلم ورلڈ لیگ نا سیکرٹری جنرل شیخ ڈاکٹر محمد بن عبدالکریم العیسیٰ سپریم کورٹ اٹی اوڑدہی کرے۔ مسلم ورلڈ لیگ انا سیکرٹری جنرل تون اوار اسہ بڑزکو کہولی ڈل اس ہم ساڑی ئس۔ پاکستان اٹی سعودی عرب نا سفیر نواف بن سعید المالکی و وزارت خارجہ نا سینئر نمائندہ غاک ہم اوڑدہی ٹی بشخ ہلکر۔ چیف جسٹس آف پاکستان جسٹس یحییٰ آفریدی مسلم ورلڈ لیگ نا ڈل ءِ بخیر کرے۔ چیف جسٹس آف پاکستان مکالمہ نا شون اٹی مسلم ورلڈ لیگ نا جہانی خذمت آتا ستاءِ کرے۔ او اسلام نا راستی آ قدر تا شون اکن مسلم ورلڈ لیگ نا کڑد ءِ امنا کرے و انتہاپسندی و اسلاموفوبیا نا توننگ کن ادارہ نا کوشست آتا ستاءِ کرے۔ چیف جسٹس آف پاکستان مسلم دنیا ٹی انسانی آسودہی نا گام گیج آتیکن مسلم ورلڈ لیگ نا کڑد انا ستاءِ کرے۔ چیف جسٹس ڈاکٹر العیسیٰ نا بصیرت والا راہشونی نا ستاءِ کرے۔ چیف جسٹس آف پاکستان تین پہ تینی شرف‘ پرامن بقائے باہمی و اسیجائی انسانی قدر تا بنداو آ جہانی کمکاری نا اہمیت آ ہیت کرے۔ چیف جسٹس ڈل ءِ سپریم کورٹ نا برجا اصلاحاتی ایجنڈا نا بابت آگاہ کرے۔ او پارے کہ انصاف اسکان رسینگ گیگ ءِ جوان کننگ کن گام گیج آک برجا ءُ۔ چیف جسٹس ادارہ ئی شفاف مننگ ءِ سوگو کننگ نا اصلاحات آتیان ڈل ءِ معلومدار کرے۔ او ٹیکنالوجی آ تالان عدالتی خذمت آتا پیش رفت ءِ اصلاحاتی ایجنڈا نا اہم انگا بشخ گوندا۔ چیف جسٹس آف پاکستان عدالتی نظام آ السی پت ءِ ودفنگ نا اہمیت آ زور شاغا۔