پورو شفافیت و حکومتی پالیسی نا رد اٹ کاریم تے پورو کننگ ءِ اولیت تننگک،سیکرٹری مواصلات و تعمیرات

سیکرٹری مواصلات و تعمیرات بابر خان پارینے کہ مالی سال 2026-27 انا غٹ شونداری ڈٹ آتے پک کروک وخت انا رِد اٹ پورو شفافیت، زرگزرانی نظم و ضبط و حکومتی پالیسی نا رِد اٹ وخت آ پورو کننگ محکمہ مواصلات و تعمیرات نا اولیت آتے ٹی اوار ءِ تانکہ صوبہ نا الس ءِ وخت آ و آب اٹو آسراتی فراوان کننگ مرے۔ دا ہیت ءِ سیکرٹری مواصلات و تعمیرات بابر خان محکمہ مواصلات و تعمیرات نا مالی سال 2025-26 انا سالانہ کارکڑد حوال نا بابت اڈ ہلوک جاچ دیوان و مالی سال 2026-27 انا بابت جوان ڈٹ بندی نا دیوان نا کماشی ءِ کرسا پارے۔ دا وخت آ ایڈیشنل سیکرٹری مواصلات و تعمیرات عباس کھوسہ، ڈپٹی سیکرٹری زاہد شاہوانی و ٹیکنیکل ایڈوائزر احسان اللہ خان دوتانی تون اوار ایلو تعلقدار کمامدار آک ہم ساڑی ئسر۔ دیوان اٹی مالی سال 2025-26 نا جم کارکڑد اٹی تدوک آ سال انا کارکڑد، برجا شونداری ڈٹ، پوسکن آ مالی سال انا سُج پام، زرگزرانی نظم و ضبط، ٹینڈرنگ، پی سی ون، ڈی ایس سی، ڈی اے سی و بھرتی تا باندات نا خوڑتی اٹ جاچ ءِ ہلنگا و مالی سال 2026-27 انا بابت تینا ٹاسک آتا جم جاچ ءِ ہلنگا‘ دا وخت آ سیکرٹری مواصلات و تعمیرات بابر خان پارے کہ وزیراعلیٰ بلوچستان میر سرفراز بگٹی نا وژن و صوبائی وزیر مواصلات و تعمیرات میر سلیم احمد کھوسہ نا پارت آتا رد اٹ محکمہ صوبہ نا شونداری و شونہالی ٹی تینا پبی کڑد ءِ ادا کیک و صوبہ نا بنجائی پنجر ءِ پوسکنوڑ تتون ہمگرنچ کننگ کن مدام کوشست برجا سلک۔ سیکرٹری مواصلات و تعمیرات بابر خان پارت کرے کہ 30 جون اسکان پورو پاننگوک کل ڈٹ آک عملی وڑاٹ ہم 100 درسد پورو مریر و مچٹ سلوک کاریم تے ہم دمدستی پورو کننگے۔ او ڈٹ آتیٹی مالی ہم آہنگی تخنگ، ایڈوانس زرتس آن منع کرے و کاریم اٹ بروک فنڈ ءِ وخت آ سرنڈر کننگ آ زور شاغا۔ سیکرٹری مواصلات و تعمیرات پوسکن آ مالی سال نا بنا غا غٹ پی سی ون تے زو تیار کننگ، ڈی اے سی و ڈی ایس سی اڈ تننگ و 15 جولائی اسکان غٹ ڈی ایس سی منظوری و 31 جولائی اسکان ٹینڈرنگ منٹس و ایلو منظوری تا پورو کننگ نا ہم پارت کرے۔ دیوان اٹی پیدوار کننگا کہ شونداری فنڈ آتے بیرہ کانود و ضابطہ غاتا رِد اٹ جاری کننگک و وخت اس کہ اے ون روڈ تون اوار اہم آ ڈٹ آتیکن فنڈز جم منظوری آن پد جاری کننگک۔