بلوچستان نا الس ءِ بنداوی آسراتی تا فراوانی ءِ اولیت ایتنہ،صدر زرداری

صدر مملکت آصف علی زرداری بلوچستان اٹ شونداری نا عمل ءِ پین ترند کننگ نا گرج آ زور شاغسا پارینے کہ بلوچستان نا الس ءِ بنداوی آسراتی تا فراوانی و صوبہ نا شونداری حکومت نا اولیت آتیٹی اوار ءِ۔ جمعہ نادے آ ایوانِ صدر نا پریس ونگ انا رداٹ صدرِ مملکت دا خیال آتا درشانی ءِ بلوچستان نا وزیر آتتون بلاول ہاؤس کراچی ٹی اوڑدہی نا وخت آ کرے۔ اوڑدہی ٹی بلوچستان اٹ امن و ایمنی، شونداری ڈٹ و صوبہ نا جم حالیت آتیا گپ و تران کننگا۔ صدرِ مملکت دا وخت آ بلوچستان اٹ برجاشونداری ڈٹ آتا پیش رفت ءِ ترند کننگ نا پارت کرے۔ او پارے کہ بلوچستان نا شونداری، امن و ایمنی نا حالیت آتے گچین کننگ، السی آسودہی و صوبہ ٹی سرگزرانی سرجز آتا مونی دننگ کن کل تعلقدار ادارہ غاک جوان وڑ اٹ کاریم کیر۔ اوڑدہی ٹی صوبائی وزیرِ آبپاشی صادق عمرانی، وزیرِ ڈٹ بندی و شونداری ظہور بلیدی، وزیرِ جان جان جوڑی میر بخت محمد کاکڑ، وزیر لائیو اسٹاک سردار فیصل جمالی، وزیر صنعت و واپار کوہیار ڈومکی، سلاہکار محنت غلام رسول عمرانی و پاکستان پیپلز پارٹی بلوچستان نا سینئر نائب صدر میر علی حسن زہری اسک ساڑی ئسر۔