حکومت بلوچستان شہید آتا پد سلوک آتے تنیا الیپک ،وزیراعلیٰ میر سرفراز بگٹی

وزیراعلیٰ بلوچستان میر سرفراز بگٹی جمعہ نا دے شہید ڈسٹرکٹ اینڈ سیشن جج عبدالحکیم کاکڑ نا اُرا غا ہنا، ہراڑے او اونا خاہوت تون ہڑزخواہی ودعا پاتیہ کرے و شہید نا چنا تتون اوار ایلو خاہوت تون اوڑدہی کرے۔ وزیراعلیٰ شہید نا درجہ غاتا بڑزی، بخشش و خاہوت کن صبرِ انا دعا کرے۔ دا وخت آ وزیراعلیٰ بلوچستان شہید نا خاہوت تون ہیت وگپ کرسا پارے کہ حکومت بلوچستان شہیدآتا خاہوت آتے تنیا الیپک۔ او پارے کہ شہید عبدالحکیم کاکڑ کانود نا بالادستی و انصاف نا نظام نا خذمت ءِ کرسا تینا جان ءِ ندر کرے۔ تاریخ اٹی اودے مدام گچین لوز آتٹی یات کننگک۔ وزیراعلیٰ میر سرفراز بگٹی پڑو کرے کہ شہید عبدالحکیم کاکڑ نا چنا تا سار سنبھال و تعلیم نا کل خڑچ آتے حکومت بلوچستان ہرفک تانکہ اوفتا تعلیم و جوان آخبت زہمی مف۔ او پارے کہ شہید آتا خاہوت آتا خیال کننگ حکومت نا زمواری ءِ و حکومت دا زمواری ءِ پورو کیک۔ وزیراعلیٰ پارے کہ دہشت گردی نا کمک اٹ بلوچستان نا امن، شونداری و ریاستی ادارہ غاتے نسخان رسیفنگ نا ہر سازش بے سہب کننگک۔ او پارے کہ دہشت گرد آک تینا لغوری آ ارادہ غاتیٹی ہچ گہس سرسہب مفسہ و حکومت دہشت گردی نا چٹفنگ کن کل ریاستی ادارہ و سیکورٹی فورس آتتون پورو سیوت اٹ سلوک ءِ۔ او پارے کہ شہید آتا قربانیک زیان مفسہ و امن دشمن آتے کانود نا رِد اٹ اوفتا ایسر اسکان سر کننگک۔ وزیراعلیٰ بلوچستان ہندی ہسپتال نا ہم دورہ ءِ کرے ہراڑے او دہشت گرد آتا جلہو اٹی ٹھپی مروک ایڈیشنل سیشن جج طارق لاشاری نا جانپڑسی ءِ کرے، اوڑتون حوال کرے و طبی آسراتی تا بابت معلومداری دوئی کرے۔ وزیراعلیٰ ٹھپی ایڈیشنل سیشن جج انا زُوت و پورو دراخ جوڑی کن دعا و نیک انگا استخواہی تا درشانی ءِ کرے۔