حکومت بلوچستان آجو، زموار و کسبی صحافت آ باور کیک،شاہد رند

وزیراعلیٰ بلوچستان نا سیاسی و میڈیا باندات کمکار شاہد رند پارینے کہ حکومت بلوچستان آجو، زموار و کسبی صحافت آ پورو وڑاٹ باور کیک و سلاہ ئی میڈیا پالیسی نا بابت غٹ تعلقدار اسٹیک ہولڈر آتا سلاہ تے قدر ایتک۔ او کونسل آف پاکستان نیوز پیپر ایڈیٹرز (سی پی این ای) نا بیان آ ردعمل ترسا پارے کہ حکومت بلوچستان میڈیا نا نمائندہ ادارہ غاتتون جھیڑہ آخا بلکہ تعمیری سلاہ و سلابت نا خواہندار ءِ۔ اگہ سی پی این ای ءِ سلاہ ئی میڈیا پالیسی نا بابت ہچ ءُ وڑ اسے نا گڑتی ارے یا او سلاہ تننگ خواہک و حکومت اوفتیا جم وڑاٹ سجفنگ کن تیار ءِ۔ شاہد رند پارے کہ نن سی پی این ای نا سرکڑدہ غاتے باقاعدہ وڑاٹ بٹنگنہ کہ او کوئٹہ غا برسا حکومت بلوچستان تون سلاہ کیر و تینا سلاہ تے مون آ تخر تانکہ پوسکن آ میڈیا پالیسی ءِ ہمو سلاہ تا رد اٹ مستی جوان، بریبر، پاش و کاریم اٹ اتوئی جوڑ کننگ مرے۔ او پارے کہ حکومت بلوچستان نا مسخت ہچ ءُ میڈیا بشخ اسے تون بے بریبری سلوک کننگ اف بلکہ پوسکن آ گرج آتا رِد اٹ پاش و میرٹ نا بنداو تخوک آ نظام اسے نا ودی کننگ ءِ۔ اگہ سلاہ نا وخت آ پالیسی ٹی گچینی اتنگ نا گرج خننگاکہ تو حکومت جوان انگا سلاہ تیا سجفنگ کن تیار ءِ۔ شاہد رند پارے کہ وزیراعلیٰ بلوچستان پیدوار وڑ اٹ پارینے کہ حکومت نا مسخت صحافتی بشخ یا میڈیا ادارہ اسے تون بیدادی کننگ اف بلکہ پوسکن آ گرج آتا رِد اٹ میرٹ، شفافیت و بریبر وارخواہی تا بنداو آ میڈیا پنجر اس جوڑ کننگ ءِ۔ اگہ سلاہ نا وخت آ پالیسی نا ٹک اسے ٹی جوانی نا گرج خننگا تو حکومت مثبت سلاہ تے است انا ہُب اٹ امنا کیک۔