اوغانستان و بھارت تون اوار کل ہمسائے ملک آتتون ہیت و گپ کن درگہ غاک ملوک ءُ، ترجمان دفتر خارجہ

دفتر خارجہ پارینے کہ پاکستان نا خارجہ پالیسی، ڈیہہ نا رکھ، ایران و ترکیہ تون بڑزکو کہولی حال حوال، دہشت گردی نا برخلاف گام گیج و سندھ طاس معاہدہ تون اوار کیہی اہم باندات آتیا پیشرفت برجا ءِ۔ پاکستان ڈیہہ ٹی امن، سوگوی و تین پہ تینی کمک نا شون کن پرعزم ءِ۔ اوغانستان و بھارت تون اوار کل ہمسائے ملک آتتون مذاکرات درگہ غاک ملوک ءُ، ولے قومی سلامتی آ ہچ ءُ سمجھوتہ اس کننگپک۔ بھارتی آبی بیدادی سگنگ مفک۔ دفتر خارجہ نا ترجمان طاہر اندرابی ہفتہ وار پریس بریفنگ اٹی پارے کہ وزیراعظم شہباز شریف اینو آن ایران و ترکیہ نا مسہ دے ئی سرکاری دورہ ءِ کیک۔ او ایران اٹی مسکوہی سپریم لیڈر آیت اللہ علی خامنہ ای نا ہڑزخواہی نا دود اٹی بشخ ہلیک و پاکستانی الس و حکومت نا کنڈ آن ہڑزخواہی کلہو سر کیک۔ اوکان پد وزیراعظم ترک صدر رجب طیب اردگان نا سلہ غا استنبول کاہک۔ نائب وزیراعظم اسحاق ڈار ہم اوفتون اوار مریک۔ ترجمان پارے کہ پاکستان ایران تون تعلقداری تے خاص ءُ اہمیت اس ایتک۔ وزیراعظم نا دورہ ہڑتوم آ ملک آتا تعلقداری و ڈیہہ انا حالیت نا رِد اٹ اہم ءِ۔ امریکہ ایران مذاکرات نا بابت ترجمان پارے کہ پاکستان ایرانی کمامدار آتتون پدریسہ رابطہ کرینے۔ دوحہ مذاکرات اٹی اہم ءُ پیشرف اس مسنے۔ ہڑتوم آ پڑک آک مذاکرات ءِ برجا تخنگ و بڑزکو کہولی نا وارخواہی تیان پد مستی ہیت و گپ آ امنا کرینو۔ ملک اٹی دہشت گردی نا برخلاف برجا کارروائی تا بابت ترجمان پارے کہ پاکستان اٹی ڈوہدار آتا برخلاف انٹیلی جنس بیسڈ آپریشن آتے ترند کننگانے۔ خیبرپختونخوا، بلوچستان و کراچی ٹی کارروائیک برجا ءُ۔ دا کارروائی تا وخت آ باجوڑ آپریشن اٹی 4 دہشت گرد خلگنار۔ خلنگوک دہشت گرد آتیٹی کالعدم ٹی ٹی پی و جماعت الاحرار نا بندغ آک اوار ئسر۔ ترجمان پیدوار موقف تینائی کرسا پارے کہ پاکستان تینا ڈغار و شاری تا رکھ آ ہچ ءُ سمجھوتہ اس کپک۔ اوغانستان آن پاکستان اٹی مروک دہشت گردی آ ہیت ترسا ترجمان پارے کہ 29 جون آ وفغان ناظم الامور ءِ دفتر خارجہ اٹی بٹنگسا سخت برانز ریکارڈ کرفنگا۔ پاکستان نا موقف پیدوار ءِ کہ دہشت گردی ٹی اوغان ڈغار نا کاریم اٹ اتنگ نا شاہدیک اریر‘ اسہ اوغان جلہو گیر اس زندہ دزگیر ہم کننگا۔ ترجمان پارے کہ وزارت داخلہ کانود آن چَپ رہینگوک اوغان شاری تا برخلاف دمدستی کارروائی نا پارت کرینے۔ بے کاغد رہینگوک آتا برخلاف کانود نا رِد اٹ کارروائی مریک۔ترجمان پارے کہ حریت راہشون یاسین ملک نا مقدمہ گڑتی نا سوب ءِ، ٹرائل تے جعلی و بے انصافی آ تالان ءِ، آزادکشمیر نا ویل آئینی وڑ انا سے، ایسر ءِ تے آزاد کشمیر نا کانود سازاسمبلی نا کمک اٹ کشنگ مریک۔ سندھ طاس معاہدہ و بھارتی وَڑ و ڈَول آ موقف ترسا ترجمان پارے کہ سندھ طاس معاہدہ شست سال مست انا و بھاز اہم ءُ معاہدہ اسے ہرانا چٹفنگ تینا خود آن مننگ کپک۔ پاکستان نا موقف ءِ کہ دا وخت آ اصل ویل دہشت گردی اف بلکہ بھارت نا کنڈ آن دیر ءِ سلہہ نا وڑ اٹ کاریم اٹ اتنگ نا سوچءِ۔