بیوٹمز یونیورسٹی کلائمیٹ چینج انٹرنیشنل سیمینار نا مہمانداری نا بود تخک،جعفر خان مندوخیل

گورنر بلوچستان جعفر خان مندوخیل پارینے کہ بیوٹمز یونیورسٹی “کلائمیٹ چینج” آ انٹرنیشنل سیمینار نا مہمانداری کننگ نا پورو بود تخک۔ موسمیاتی بدلی بیرہ اسہ گلوبل چیلنج اس اف بلکہ دا انسانیت نا بقاء و ردوم نا باندات اسے‘ نن دا ہیت و گپ ءِ ایکو سسٹم نا بحالی آ اقوام متحدہ نا عشرہ 2021-2030 تون ہم گنڈنہ تانکہ اقوام متحدہ نا نمائندہ غاتتون اوار ایلو پنی آ سائنسدان و چاہندار آک ہم داٹی بشخ ہلیر۔ دُن پا کہ دا کمک مچ آ انسانیت نا اسہ اہم ءُ گرج اسے۔ بھاز زُو نن کوئٹہ شار اٹی کلائمیٹ چینج و آرٹیفیشل انٹیلی جنس آ جہانی سیمینار و کانفرنس نا اڈ تننگ نا مستائی ءِ ہلینہ۔ سرکاری یونیورسٹی تے تینا الس نا گرج آتے پورو کننگ و جہانی کہول آ انسانی بقا کن اسہ کڑدار اس ادا کننگ نا لائخ جوڑ کننگ ننا کل آن بھلا سرسہبی ءِ۔ دا خیال آتا درشانی ءِ او بیوٹمز یونیورسٹی نا وائس چانسلر پروفیسر ڈاکٹر خالد حفیظ تون گورنر ہاؤس کوئٹہ ٹی اوڑدہی نا وخت آ ہیت و گپ کرسا کرے۔ دا وخت آ گورنر بلوچستان جعفر خان مندوخیل پارے کہ دا ہیت گڑتی نا سوب ءِ کہ دا وخت آ پاکستان اٹی قومی و صوبائی ہڑتوم آ کہول آ نن اسہ بھلو راستکی اسے تون مون تروک اُن کہ ننا پروفیشنل و خوانندہ بندغ آتا کچ اٹی پدریسہ ودکی مننگ اٹی ءِ ولے نن روزگار نا وارخواہی تے دا ودکی نا کچ آ ودفنگ کپنہ ہرا اسہ بھلو ویل اسے۔ نن حکومتی کہول آ دا کل روشن ذہن تے ایڈجسٹ کننگ کن ہندن ءُ پوسکن ءُ وارخواہی ودی کننگ کینہ تانکہ نن اسہ مدامگی ایسر اس کشنگ کین و دا ہیت ءِ پک کننگ مرے کہ اسہ خوانندہ ورنا‘ یا ڈگری ہولڈر اس زرگزرانی وڑاٹ کس انا آہری مف۔ گورنر مندوخیل پارے کہ ننے تینا پبلک سیکٹر یونیورسٹی تا طالب علم آتے ترندی اٹ شون ہلوک دنیا کن تیار کننگ نا گرج ءِ۔