نوشکے پریس کلب نا کنڈ آن پنی آ صحافی زبیر احمد بلوچ نا کزیت آ ہڑزخواہی

پریس کلب نوشکے نا ترجمان روزنامہ الجزیرہ کوئٹہ نا چیف ایڈیٹر زبیر احمد بلوچ نا کزیت آ است ہسونی و ارمان نا درشانی ءِ کرینے۔ تینا ہڑزخواہی نا بیان اٹی ترجمان پارے کہ ایماندار زبیر احمد بلوچ اسہ لائخ، زموار و کسبی صحافی اس ئس ہرا صحافت نا پڑ اٹی جوان خذمت سر تس۔ اونا کزیت برین ٹیومر نا سوب آن مس ہراڑان صحافتی تپہ اسہ مخلص، خواری کش و آزمودہ کار صحافی اسے آن محروم مسنے۔ ترجمان ایماندار نا خاہوت، تینائی و صحافتی برادری تون ہڑزخواہی کرسا دعا کرے کہ اللہ تعالیٰ ایماندار ءِ جنت الفردوس اٹی بڑزکو درجہ عطا کے و پدخاہوت ءِ صبرِ جمیل عطا کے۔ آمین۔