دہشت گرد آک سکرات آٹو، ریاست تینا زمواری تے پورو کننگ ءِ/وزیر اعلیٰ میر سرفراز بگٹی

وزیراعلیٰ بلوچستان میر سرفراز بگٹی پارینے کہ شاری تا جان و مال انا رکھ حکومت نا اولیکو زمواری ءِ و دا زمواری نا پورو کننگ کن حکومت ہر وڑ انا گام گیج کننگ اٹی ءِ۔ او پارے کہ بلوچستان اٹی پیش بروک ہر وڑ انا ارمانی واقعہ اسے ءِ راستی تیان چَپ پیش کننگ الس ءِ ریفنگ و صوبہ نا منفی دروشم اس ودی کننگ نا کوشست کننگک۔ وزیراعلیٰ بلوچستان میر سرفراز بگٹی سے شنبے آ کراچی آ ہنا و دشت انا علاقہ ٹی ارمانی آ شکست اسے نا گواچی مرسا شہید مروک پوریاگر ایماندار علی مرتضیٰ نا اُرا غا ہنا، ہراڑے او ماتنی خاہوت تون ہڑزخواہی کرے، ایماندار نا درجہ غاتا بڑزی کن دعاپاتیہ کرے و خاہوت ءِ صبر انا تلقین کرے۔ دا وخت آ میڈیا تون ہیت و گپ کرسا وزیراعلیٰ پارے کہ حکومت شاری تا جان و مال انا رکھ ءِ تینا اولیت تکّک و دا بابت ہچ ءُ وڑ اسے نا ڈیوالئی سگنگ مفک۔ او پارے کہ دہشت گرد آک تینا سکرات آٹو و ریاست اوفتا برخلاف پورو واک و عزم اٹ جنگ کننگ اٹی ءِ۔ او پارے کہ دشمن ہراتم مون آ مرے تو اونا مقابلہ کننگ آسان مریک، ولے گرے زون آتیٹی کارروائی مشکل مریک‘ ریاست ہچ ءُ ہر وڑ انا چیلنج تون مون تننگ نا پورو واک تخک۔ وزیراعلیٰ میر سرفراز بگٹی پارے کہ دشت اٹی پیش بروک آ ارمانی آ واقعہ ءِ سوشل میڈیا غا راستی تیان چَپ پیش کننگ انگ ءِ۔ او پارے کہ دا وڑ انا منفی و ریفوک آ بیانیہ نا مذمت کننگ المی ءِ و راست ءِ مون آ اتنگ وخت انا اہم ءُ گرج اسےِ۔ او پارے کہ بلوچستان نا شاہراہ تیا ہڑدے کیہی ہزار کلومیٹر نا سفر کروک آ شاریک رکھوک وڑاٹ تینا مزل آ سر مریرہ، ہندا سوب آن اسہ واقعہ اسے مچ آ صوبہ نا حالیت اتٓتون گنڈنگ سہی اف۔ وزیراعلیٰ ایماندار علی مرتضیٰ نا خاہوت ءِ باور کرفے کہ بلوچستان حکومت اوفتے تنیا الیپک۔ او پڑو کرے کہ ایماندار نا مسن تا ولفنگ و اوفتا تعلیم و ہیلکاری کل زمواری تے بلوچستان حکومت ہرفک تانکہ خاہوت تون پورو کمک مننگ کے۔ وزیراعلیٰ پارے کہ حکومت زہمی خاہوت تون ہر وڑ انا کمک کیک و الس نا جان و مال انا رکھ‘ امن وایمنی نا برجائی و دہشت گردی نا پورو چٹفنگ کن تینا کوشست آتے پین گچین وڑ اٹ برجا تخک۔