تعلیم نا شونداری کن،بلوچستان اٹی 1.58 ارب روپئی نااسکول مِیل پروگرام نا بنا

بلوچستان حکومت چناتا غذائی گرج آتے پورو کننگ و جان جوڑی نا گچین بھرم دوئی کننگ کن کوئٹہ نا پرائمری اسکول آتا طالب علم آتیکن 1.58 ارب روپئی مالیت نا اسکول میل پروگرام نا بناءِ کرینے۔ سرکاری دستاویز آتا رداٹ بلوچستان لمہ و چنانا جان جوڑی، اسکول آتیٹی غذائیت، واٹر، سینی ٹیشن اینڈ ہائجین (واش) انفراسٹرکچر و ڈی ورمنگ پروگرام تے تینا شونداری اولیت آتیٹی اوار کرینے۔ کوئٹہ نا پرائمری اسکول آتا طالب علم آتیکن اسکول میل پروگرام پائلٹ بنداو تیا بناءِ کننگانے۔ ہرانا جم خڑچ 1.579 ارب روپئی ءِ وخت اس کہ بروک آ مالی سال اٹی داڑکن 315.9 ملین روپئی جتا کننگانے۔ دا پروگرام صوبہ ٹی برجا غذائیت نا بابت چندی ڈٹ آتیان اسٹ ءِ ہرافتا مسخت چناتا جان جوڑی و غذائی حالیت آتے گچین کننگ ءِ۔ دستاویز آتا رداٹ بلوچستان اٹی لمہ و چنانا جان جوڑی نا جوان پروگرام ہم برجاءِ، ہرانا کل خڑچ 2 ارب روپئی ءِ وخت اس کہ داڑکن 228.8 ملین روپئی جتا کننگانے۔ ہندا وڑ اسکول آتیٹی واٹر، سینی ٹیشن اینڈ ہائجین (واش) آسراتی تا فراوانی کن اسہ جتا ءُ ڈٹ اسے ہم عمل کننگ انگ ءِ‘ ہرانا جم خڑچ 2 ارب روپئی و برجا سال اکن جتا کروک زر 200 ملین روپئی ءِ۔ رپورٹ نا رداٹ کوئٹہ نا ایسٹرن بائی پاس نا ہند آلمہ، پوسکن ودی مروک و چنانا تا جان جوڑی نا اسہ پوسکن آسراتی ہند اس جوڑ کننگانے ہراڑا جم وڑاٹ 400 ملین روپئی خڑچ بریک وخت اس کہ دا ڈٹ اکن 200 ملین روپئی جتا کننگانے۔ دا ڈٹ بلوچستان اٹی جان جوڑی و غذائیت نا ٹک آتے گچین جوڑ کننگ کن صوبائی حکومت نا گیشتر سج پام نا بشخ ءِ۔ حکومت غذائیت، لمہ و چنانا جان جوڑی، اسکو ل آتیا تالان نیام تمنگ و سفائی نا بنداوی پنجر ءِ صوبہ نا اہم شونداری اولیت گوندانے۔