پاکستان و بلوچستان نا روشنا آخبت نا بابت اومیت آک سوگو ءُ،جعفرخان مندوخیل

گورنر بلوچستان جعفرخان مندوخیل پارینے کہ نن پاکستان و بلوچستان نا روشنا آخبت نا بابت بھاز پراومیت اُن و و دا رد اٹ ننا اومیت آک سوگو ءُ۔ گوادر پورٹ نا حقی شونداری و فعالیت اسہ چُپ ءُ زرگزرانی انقلاب اس جوڑ مرسا مونی بریک۔ گوادر پورٹ اسہ ہندن ءُ درگہ اسے ہرا پاکستان ءِ جہانی اقتصادی و واپاری سرجز آتا جہانی وَت اٹ بدل کیک۔ دا خیال آتا درشانی ءِ او سندھ انا دارالحکومت کراچی ٹی چائنا نا قائم مقام قونصل جنرل مسٹر فینگ ڈیہینگ تون اوڑدہی نا وخت آ گپ و تران کرسا کرے۔ دا وخت آ پولیٹیکل ڈائریکٹر مسٹر ژانگ سونگ و مسٹر وانگ ژاو شیانگ ہم ساڑی ئس۔ گورنر بلوچستان پارے کہ سینٹرل ایشیا غان ہلیس سویلی ایشیا و مچ آ نیامی دے ٹک اٹی پاکستان اسہ پول انا کڑد ادا کننگ نا لائخی تخک ہرا مچ آ ڈیہہ انا زرگزرانی منڈی، ربیدگی و صنعت آتے تین پہ تین گنڈک۔ ننا دا سیاسی و زرگزرانی سُج پام بیرہ پنجر اس اف بلکہ دا اقتصادی انضمام و مریس مدی شونداری کن اسہ دانشمندانہ گام اسے۔ او مستی پارے کہ پاکستان و چین نا سیاسی و سفارتی تعلقداری نا 75میکو سال دے اڈ تننگا۔ شریداری نا دا مریس مدی تاریخ ہڑتوم آ ملک آتا مریس مدی دوستی و واک نا اسہ پاش ءُ شاہدی اسے ہرا دہائی تا شونداری، جتا جتا چیلنج و تین پہ تینی پت اٹی سوگو سلوک ءُ۔ گورنر بلوچستان جعفرخان مندوخیل پارے کہ داسہ ننا پورو چکار صوبہ نا روشنا آخبت آٹےِ۔ گورنر مندوخیل پارے کہ چائنا آٹیفیشل انٹیلیجنس و پوسکنوڑ ٹیکنالوجی ٹی بھلو لائخی و آزمودہ اس تخک۔ چین نا دا چاہنداری بلوچستان اٹی اسہ پوسکن ءُ چین اسے نا جوڑ کننگ اٹی کمک و فکری راہشونی کننگ کیک۔ چین ننا پبلک سیکٹر یونیورسٹی تا کمک اٹ طالب علم آتے کن جہانی آب انا تعلیم ءِ رکھ کرسا اوفتے پوسکن آ دور انا خواست آتا رداٹ پوسکنوڑ چاہنداری تیان شپ کننگ کیک۔ ہنداوڑ اسکالرشپ و تعلیمی وارخواہی تا کمک اٹ چائنا ننا ورناتے کن سرسہبی نا پوسکن آ بڑزی اسکان رسیفنگ نا کسر رسینگک۔ اوڑدہی نا وخت آ چائنا نا قائم مقام قونصل جنرل پارے کہ پاکستان جہانی کہول آ تینا سفارتی لائخی نا پاش درور اس تسنے ہراڑے کم و ود نیم کرن آن پد امریکہ و ایران ہڑتوم آتے مذاکرات نا میز آ اتنگ اٹی سرسہب مس۔ دا سفارتی سرسہبی نا سوب آن نئے بیرہ جہانی کہول آ پاکستان نا قد بھلن مس بلکہ سفارتکاری نا تاریخ اٹی اسہ پوسکن ءُ تاریخ اس ہم نوشتہ مس۔ حکومت بلوچستان زرگزرانی شونداری نا ڈٹ آتیا پبی وڑ اٹ عمل کننگ ءِ۔