راج اٹ تعلیم دوئی کننگ تون اوار عملی گام گیج کننگ نا ہم گرج ءِ‘ملک ولی کاکڑ

کوئٹہ : گورنر بلوچستان ملک عبدالولی خان کاکڑ پارینے کہ راج اٹ تعلیم دوئی کننگ تون اوار عملی گام گیج کننگ نا ہم گرج ءِ‘ حقی آ علم ہمودے ہرا راج اٹ مثبت وجوان ءُ بدلی اتنگ کے و انسان ءِ انسان دوست جوڑ کے۔ نیشنل ورکشاپ بلوچستان نا شریدار آتیان تران کرسا گورنر بلوچستان پارے کہ دا ورکشاپ اسہ درسگاہ اسے داڑے منہ ہفتہ نا چنکا وخت اٹ نم ہموڑے گڑاتے ہیل کیرے ہرا بھلو یونیورسٹی تے ٹی ہم ہیل کننگ مفک۔ دا ہیت آتے او نیشنل ورکشاپ بلوچستان نا گڈیکو دود انا شریدار آتیان تران کرسا کرے‘ گڈیکو دود آن تران نا وخت آ گورنر بلوچستان پارے کہ نم خوش قسمت اُرے کہ نمے دا ورکشاپ نا کمک اٹ لائخ و آزموندہ کار استاد و چاہندار آتیان ہیل کننگ ناوارخواہی رسینگانے‘ داڑتون اوار پاکستان نا چندی علاقہ غاتیان دا ورکشاپ اٹ بروک آتتون مشاہدہ و آزموندہ غاتیا ہم گپ وتران کننگ کیرے‘ گرج دا گراناءِ کہ دا ورکشاپ نا پورو مننگ آن پد تینا تینا علاقہ و محکمہ غاتے ٹی داکان دوئی کروک علم وآزموندہ ءِ پورو خواری و دیانت اٹ کاریم اٹ اتیرے تاکہ نما محکمہ ناکارکڑد گچین مرے‘ اومیت کننگ مریک کہ دا ورکشاپ نا شریدار آک ملک وصوبہ غاتے ٹی سوگو امن‘ ہم آہنگی و قومی جوزہ نا شونداری کن زیات متحرک‘ فعال و جوش اٹ کڑد ادا کیرہ۔ او پارے کہ ورکشاپ اٹ اول اٹ مرض نا نشاندہی مریک ولدا چاہندار آک تشخیص کیرہ و اوکان گڈ درمان نا پارہ۔ گورنر بلوچستان پارے کہ پاکستان ءِ مون تروک چیلنج آتتون مون تننگ کن ہر بندغ ءِ تینابشخ انا کڑد ءِ ادا کروئی مریک۔ دود انا اخیر اٹ گورنر بلوچستان ورکشاپ نا شریدار آتے ٹی سَند بشخ وپانٹ کرے۔

(آن لائن)