پارلیمان ءِ قومی زند انا دنگ جوڑ کننگ نا وخت بسنے، وزیراعظم

اسلام آباد: وزیراعظم محمد شہباز شریف پارینے کہ پارلیمان ءِ حقی وڑاٹ قومی زند انا محور جوڑ کننگ نا وخت بسنے، آئین ءِ مون آ تخسا ترتیب تروک آ رولز آف دی گیم ہی مون آ ہِننگ نا کسر ءِ۔ دوشنبے نادے آ آئین پاکستان 1973 نا 50 می سال دے انا وخت آ تینا ٹویٹ اٹی وزیراعظم محمد شہباز شریف پارے کہ اینو قوم 1973 نا آئین نا گولڈن جوبلی اڈتننگ اٹی ءِ، دا اسہ مقدس ءُ دستاویز اسے ہرا تدوک آ نصف صدی ٹی بھاز انگا طوفان تتون مون ترسا بنجاءِ یکجا تخا۔ وزیراعظم پارے کہ او دا وخت آ آئین نا خالق آتے اوفتا سیاسی دور اندیشی آ خراج عقیدت پیش کینہ۔ وزیراعظم پارے کہ 1973 نا آئین نا ننا قومی کڑد، شناخت و آخبت کن کسر اس متعین کننگ اٹ مرکزی ءُ کڑد اسے۔ اوپارے کہ وخت بسنے کہ پارلیمان ءِ حقی وڑاٹ تینا قومی زند انا محور جوڑ کننگے وآئین ءِ مون آ تخسا جوڑ کروک رولز آف دی گیم ہی مون آ ہِننگ نا کسر ءِ۔ وزیراعظم محمد شہباز شریف دستور پاکستان 1973 نا 50 سال پورو مننگ آ قوم ءِ مبارکباد پیش کرسا پارینے کہ 1973 نا آئین قائد اعظم محمد علی جناح، علامہ اقبال و بانیان پاکستان نا بصیرت نا نچوڑ ءِ ہرا قوم ءِ متحد تخانے، تاریخ اٹی اولیکو وار غٹ جماعت آک اواری اٹ آئین نا واک اٹ وونٹ دُز، سلیکٹڈ و مسلط کروک آ ٹولی ءِ اقتدار آن کشا پیشن کرے، ملک ءِ زرگزرانی شونداری و خود انحصاری آن ہمکنار کرسا و الس نا زند اٹی آسانی اتسا آئین نا واک و شان ءِ ودفنہ۔ دوشنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ داخیال آتا درشانی ءِ او دستور نا 50 سال پورو مننگ آ تینا خصوصی کلہو اٹی کرے۔ وزیراعظم دستور نا ٹیکی تروک آ غٹ سرکڑدہ، جماعت و پارلیمان نا باسک آتے خراج عقیدت پیش کرے۔ او ہمو غٹ محترم شخصیت آتے ہم خراج تحسین پیش کرے ہرا پنجا سال ا ٹی آئین نا عزت وشرفمندی ءِ ودفیر و اونا سوگوی ٹی کڑد ادا کریر۔ وزیراعظم پارے کہ 10 اپریل 1973 آن 10 اپریل 2023اسکان دستور پاکستان قوم ءِ یکجا تخانے، دستور ہی پاکستان اٹ رہینگوک آ غٹ قوم تا امنائی عمرانی معاہدہ ءِ، دستور غٹ ریاستی ادارہ غاتا لمہ ءِ۔ اوپارے کہ سانحہ، شکست و سازشی واقعہ غاتیان پد ہم آئین تینا وجود ءِ برقرار تخا۔ اوپارے کہ ذوالفقار علی بھٹو آئین نا جوڑ کروک ہم ئسک و داڑکن جون ءِ ندر کروک آہم، وزیراعظم پارے کہ او دا وخت آ گودی بے نظیر بھٹو و قائد محمد نواز شریف ءِ خاص وڑاٹ سلام پیش کیک ہرافک آئین نا سربلندی، رکھ و مون آ دننگ کن تاریخی کڑد ادا کریر۔ وزیراعظم پارے کہ تاریخ نا حسین ءُ اتفاق اسے کہ آئین نا گولڈن جوبلی اڈ ترسا ملک اٹ آئین، جمہوریت و الس دوست جماعت آک اقتدار اٹی ءُ، آئین نا گولڈن جوبلی ہندن ءُ وخت اسے آ بسنے ہراتم تاریخ اٹی اولیکو وار غٹ جماعت آک اواری اٹ آئین نا واک اٹ وونٹ دُز، سلیکٹڈ و مسلط ٹولی ءِ اقتدار آن کشا پیشن کریر۔ اوپارے کہ آئین پاکستان نا محافظ و سمت نما ءِ، دانا رکھ ءِجون ءِ ترسا ہم کینہ، ملک ءِ زرگزرانی شونداری و خود انحصاری آن ہمکنار کرسا و الس نا زند اٹی آسانی اتسا آئین نا واک و شان ءِ ودفنہ۔

(اے پی پی)