آرٹ انسان نا ذہن اٹ ودی مروک آ جوزہ غاتا خلاصہ مریک‘ شہک بلوچ

کوئٹہ : ڈپٹی کمشنر کوئٹہ شہک بلوچ پارینے کہ آرٹ نہ بیرہ ننا ہیب کیب وخت اس کہ حالیت آتے بیان کیک وخت اس کہ انسان نا ذہن اٹ ودی مروک آخیال و جوزہ غاتا وضاحت یاخلاصہ اس ہم مریک۔ اسہ آرٹسٹ تینا ہیب کیب نا چاگڑد آن زہمی مرسا خوشی، فریشانی و جوزہ غاتے رنگ آتا کمک اٹ تینا کینوس اٹ اتنگ نا کوشست کیک۔ ہر آرٹ انا پد آن جوزہ نا اسہ کسہ اس مریک۔ دا اسہ انسان نا جوزہ و اونا پٹ وپول آتے ایلو انسان تسکان سر کننگ نا زیبا ءُ وڑ اس مریک۔ دا خیال آتا درشانی ءِ او بلوچستان یونیورسٹی سٹی کمپلیکس اٹ آرٹس ڈیپارٹمنٹ نا کنڈآن کوئٹہ آرٹ فیئر 2023ء نا ایسری دود آن تران کرسا کرے۔ او وخت آ او آرٹسٹ آتا نمائشی فن پارہ غاتا ستا ءِ کرے۔ او پارینے کہ بلوچستان نا طالبعلم آتیٹی لائخی نا ہچ ءُ کمتی اس اف۔ بیرہ اوفتے وارخواہی نا گرج ءِ۔ تعلمیی ادارہ غاتیٹی داوڑ نا کاریم تا اڈ تننگ آن ذہنی لائخیک پاش مریرہ۔ وخت اس کہ دا لائخی تیان کاریم ہلسا ملک و قوم اکن کاریم کیرہ۔ او پارینے کہ داوڑ نا نمائشست طالبعلم آتا ذہن سازی تون اوار اوفتا لائخی تے مون آ اتنگ اٹ ہم کمک مریک۔ نمائش اٹ ساڑی فن پارے بلوچستان نا قدرتی مناظر، انسانیت، تہذیب و دود ربیدہ نا ہیب کیب اٹ پیری کیرہ۔ ہرا ناظرین تیا جوزہ ئی و فکری اثر شاغرہ۔ ڈپٹی کمشنر کوئٹہ ضلعی انتظامیہ نا کنڈآن دا وڑ نا تعلیمی کاریم تا جوان کمک نا پارت ءِ کرے۔

(خ ن)