بنجا نوکاپ زہمی تا کمک ءِ کتو، وزارت آتے النہ، بلاول بھٹو

کراچی: چیئرمین پاکستان پیپلز پارٹی و وزیر خارجہ بلاول بھٹو زرداری پارینے کہ پاکستان ءِ کشاری بشخ اٹ تینا نت تیا سلفنگ ءِ اولیت ایتنہ‘ نوکاپ نا زہمی تتون کروک قول تے پورو کننگے آخا تو وزارت آتے سنبھالنگ مشکل مریک سیاست نا جاگہ غا ننے زرگزران آ چکار کننگ ناگرج ءِ۔ کراچی ٹی دود آن تران کرسا پیپلز پارٹی نا چیئرمین بلاول بھٹو زرداری پارے کہ سندھ حکومت نوکاپ نازہمی تا کمک ءِ کننگ اٹی ءِ‘ نوکاپ آن کشاری زرگزران ءِ بھلو نسخان اس مس‘ ننے کشاری بشخ آ چکار کروئی مریک‘ چنکا زمیندار تتون کمک کرسا زرگزران اٹ گچینی اتنگ کینہ‘ کبینی آن ہر تپّہ مشکل آتے ٹی گٹ ءِ‘ کشاری بشخ آ زرکاری کتون تو امر کشاری ملک اس پاننگ مرینہ۔ وزیر خارجہ پارے کہ سندھ اسٹ انگا صوبہ ءِ ہرا خولم نا نہاد ءِ چار ہزار روپئی پک کرے۔ آصف زرداری ہراتم صدر مس تو پاکستان نا ایکسپورٹس بھاز کم ئس‘ ہرا گڑاءِ پاکستان امپورٹ کریکہ، یوکرین نا زمیندار تے ڈالر تسکہ‘ آصف زرداری نا دور اٹ کشاری بشخ آخصوصی چکار کننگا‘ چنکازمیندار تے تینا نت تیاسلفنگ خوانہ‘ پاکستان ءِ کشاری بشخ اٹ تینا نت تیا سلفنگ ءِ اولیت ایتنہ‘ او پارے کہ وزیراعظم تون ہیت کینہ کہ نوکاپ نازہمی تتون کروک قول تے پورو کننگے اومیت کیوہ کہ غاو تے ایسر کننگک۔ او پارے کہ بنجا ءِ نوکاپ نازہمی تتون کروک قول تے پورو کروئی مریک۔ چیئرمین پیپلز پارٹی مستی پارے کہ بے نظیر انکم سپورٹ پروگرام نا کمک اٹ چنکا زمیندار تتون کمک کینہ‘ چنکا زمیندار تتون کمک کرسا کشاری پیداوار ءِ ودفنہ‘ بنجائی حکومت نوکاپ نازہمی تتون ہرا قول تے کرینے ہمو کل ءِ پورو کننگے‘ نوکاپ نا وخت آ 5 ملین ایکڑ رقبہ غا فصل آک بھس مسنو‘ نوکاپ آن کشاری زرگزران ءِ بھاز بھلو نسخان اس مس‘ گدرینگوک آ دَہ سال اٹ زرگزران ءِ ہرا وڑ انا زرکاری نا گرج ئس ہمو مننگ کتو۔ وزیر خارجہ پارے کہ نن مردم شماری آ گڑتی درشان کرین‘ سندھ وایلو صوبہ غاتا کچ اٹ پیدوار ءُ فرق اس ئس‘ بیرہ پنچ درسَد بلاک آ دوارہ مردم شماری نا پارین تاکہ راست انا سما تما‘ ہمو کاریم متو‘ ہمو مردم شماری آ 2018 نا گچین کاریک مسر‘ پیپلز پارٹی ہندا گڑتی تے درشان کرسا کرے‘گچین کاریک خڑک مسر تو پڑو مس کہ ڈیجیٹل مردم شماری مریک ہرا فیڈ بیک ننے رسینگانے‘ دا ڈیجیٹل مردم شماری آ پیپلز پارٹی و الس ناہم گڑتیک اریر۔ بلاول بھٹو زرداری مستی پارے کہ اگہ ہندا وڑ مردم شماری مروئی ءِ تو پیپلز پارٹی اودے امنا کپک‘ اگہ بنجائی حکومت ننا اعتراض آتیا چکار کپک تو صوبائی حکومت مردم شماری ٹی بشخ ہلپک‘ بنجائی حکومت تینٹ مردم شماری کرفے، پیپلز پارٹی اسہ سائنٹفک و حقی ءُ مردم شماری سے نا مخ تفی ءِ کننگ کیک دا وڑ انا مردم شماری ءِ ہم سپورٹ کننگ کپنہ۔ وزیر خارجہ بلاول بھٹو زرداری پن ہلپرسا پارے کہ سیاسی ہل زمان پارک اٹ بیرم تا کیرغ آن تینے ڈکانے‘ ہل انا نت اٹ خل ءِ‘ دانگ اینگ نرنگ اٹی ءِ۔ سیاسی ہل انا جاگہ غاننے زرگزران آچکار کننگ نا گرج ءِ۔ چیئرمین پی پی پارے کہ پیپلز پارٹی اسہ نظریاتی ءُ جماعت اسے‘ ننا دشمن کس اف‘ نناگو بے روزگاری‘ غریبی تون ءِ‘ ننا گو ہچ ءُ سلیکٹڈ ودتک اسے تون اف‘ نن مدام الس ناویل آتا ایسری ءِ اولیت تسونن۔

(آن لائن)